HDP’yo ke şaristananê Kurdan de stratejîya şaredarîyanê ke ameyê xespkerdene newe ra dewrê şarî bikero û hûmara înan bikero vêşî; şaristananê Tirkîya de zî bi faşîzmê AKP-MHP’yî bido vînîkerdene şopneno muhîmîya şîyayîşê serê sindoqan bi hawayêkê xurtî ana ziwan.  HDK zî vengdayîşanê seba nê amacî domneno.

Hem-vervatoxê Kongreya Şaran a Demokratîke (HDK) Sedat Şenogluyî vat, “Ganî şarî, kedkarî û kesê ke hetê demokrasîyî de yê îradeyê xo bigêrê xo dest.  Weçînitişî seba nê firsendêk ê. Na yewe ra ganî qetîyen bi nê hawayî nizdê weçînitişî bibê. Muheqeq û muheqeq ganî şar îradeyê xo vejo werte û reya xo bişuxulno. E, belkî vizêr zî wina bi la her reya ke dîyena reyêka anor û azadîye ya.”

Ganî Ê Bêrê Binfînayene

Şenogluyî vat: “Hêzê rejimî zî Serekkomar zî eşkera eşkera tayê çîyan îlan kenê. Nika ra wazenê ke dest bidê serê îradeyê şarî. Vanê ‘ma vînî bikerê zî ma do musade nêkerê.’ Ma vînenê ke nê tehdîdî hetê kîtleyêka pîle ya cimarî de hendî pere nêkenê. Na yewe ra ganî îqtîdarî rê dersêka rastekîne û bihêze bêro dayene, bi nê hawayî no rejim bêro binfînayene. No, do seba kesanê ke mucadeleyê azadîye danê moralêkê muhîmî û xorabawerkerdişî bido.”

Ganî Ma Wareyanê Xo Yê Azadîye Awan Bikerê

Şenogluyî dewam de wina qisey kerd: “Rejimê AKP’yî her hawayî ra çîyan keno qedexe. Ca yeno qanûn û qaydeyan zî keno qedexe. Rayîrêkê sazkerdişê sîstemo ke hêzê xo şarî ra gêno yew tera zî îdareyê cayî yê. Nê cayan de şar do bieşko problemanê xo ser o vindero, seba çareserkerdişê problemanê xo sîstemê xo bica bîyaro, çunke no heq heqêko xeylî meşrû û demokratîk o. Ganî ma wina gaman bierzê ke netîceyê weçînitişan ra ravêrê, serranê ameyoxan bigîrê binê garantî. Rayîrê nê zî demokrasîyo cayî û yo rasterast o. Naye ra ma xeylî ehemîyet danê weçînitişî.”

Ganî Ma Qesawetan Bierzê Hetêna

Şenogluyî peynîya qiseykerdişê xo de nê vatî: “Kurdistan de hemverê qeyûmî de îradeyê şarî bi hawayêkê xeylî bihêzî vejîya werte.  Do şaredarîyî pey de bêrê girewtene. Rojawan de zî nuqtayêka hîna krîtîke esta. Ganî kedkar û şarî wina bifikrîyê; stratejîya HDP’yî ya weçînitişî medotêk yewkerdox o. No eşkeno bêro sereberdene û bi nê hawayî AKP bêro binfînayene. Bêguman ma zî seha de vînenê ke tayê qesawetê şarê ma estê, ganî nê hendî bierzîyê hetêna. Na hemle hemleyêka muhîm a ke do AKP’yî peyde verdo. Şarê ma do bi eqlêkê selîmî tê bigêro û goreyê peymeyanê wijdanî tê bigêro û seba HDP’yî reya xo bido.”