Merdimê vîndîbîyayîyan ê Amed û Êlihî çalakîya roniştişî viraşte, vengdayîş bi selahîyetdaran kerd û vat, “Nê roşanî de, derheqê vîndîbîyayîyan de ma şaş bikerê.”

Merdimê vîndîbîyayîyan û Beşê Komela Heqanê Merdiman (ÎHD) ya Amedî de hewteyo 538’inî de reyna beşê ÎHD’yî de ameyî têhet û aqûbetê vîndîbîyayîyan persayî. Merdimê vîndîbîyayîyan reyna fotografê merdimanê xo yê ke ameyê vîndîkerdene akerdî û pankarta ser o “Wa vîndîbîyayî bêrê dîyayene, kiştoxî bêrê muhakemekerdene” ameyo nuştene akerde. Endam û rayberê ÎHD'yî û merdimê vîndîbîyayîyan beşdarê çalakîye bîyî.

Amed

Sekretera Beşê ÎHD’yî ya Amedî Yuksel Aslan Acere çalakîye de qisey kerd û wina vat, “Çalakîya Dayîkanê Şemeyî bîye têkoşînê merdimîye. Serranê 90’an de bi hezaran merdimî kuçeyan û keyayanê xo de ameyî destbendkerdene, vîndîkerdene û qetilkerdene. Gorê tayînan virazîyayî labelê xeylê ci bê goran mendî. Hîna zî faîlî nênê cezakerdene, yenê xelatkerdene. Na rewşe sey birînêk tarîxê merdimîye de cayê xo girewt. Seba naye bi serran o ma têkoşînê merdimîye danê. Heta ke aqûbetê vîndîbîyayîyan nêvejîyo werte ma do çalakîya xo ya roja şemeyî dewam bikerê.”

Endamê Komîsyonê Vîndîbîyayîyan ê ÎHD’yî Avûkat Hasan Yalaçinî zî hîkayeya Kamîl Bîlgeçî yo ke 27’ê Teşrîna Peyene 1995 de qezaya Sîlopî ya Şirnexî de edlîya ra vejîya û şi keyeyê xo û dima bi tu hawayî xebere ci ra nêameye girewtene, vate û aqûbetê Hasan Yalaçinî persa. Dimayê qiseykerdişan, 5 deqayî çalakîya roniştişî ameye viraştene.

Elîh

Elîh de zî, merdimê vîndîbîyayîyan û ÎHD'yî bi eynî amancî hewteyê 444’inî de ameyî têhet û çalakîya xo dewam kerde. Merdimê vîndîbîyayîyan û rayberê ÎHD'yî banê ÎHD'yî de fotografê vîndîbîyayîyan akerdî û pankarta ke ser o “Wa vîndîbîyayî bêrê dîyayene, kiştoxî bêrê muhakemekerdene” ameyo nuştene akerde. Çalakîya nê hewteyî de aqûbetê Teyfîk Ayî yo ke 17’ê Çele 1995 de ameyo vîndîkerdene, ame persayene.

Serekê Beşê ÎHD’yî yê Êlîhî Mehmet Zekî Tangunerî çalakîye de qalê vîndîkerdişê Teyfîk Ayî kerd û wina vat, “Qereqolê bajarokê Şenkoyî yê qezaya Mîdyatî ya Mêrdînî ra vengdayîş bi Ayî ame kerdene. Ay o ke şîyo qereqol reyêka bîne ci ra xebere nêameye girewtene.” Dimayê qiseykerdişan, 5 deqayî çalakîya roniştişî ameye viraştene.