17 tepişteyê sîyasîyê ke grevê vêşanîye û rojeyê mergî bi serkewtiş qedênayo, ameybî berdene bi Nêweşxaneyê Herêma Wanî ya Perwerde û Cigêrayîşî û Merkezê Tibî yê Dursun Odabaşi yê Yuzuncu Yilî. 13 xoverdayoxê rojeyê mergî yê ke ameybî berdene bi Merkezê Tibî yê Dursun Odabaşiyî, da zanayene ke şertê nêweşxane baş nîyê, seba ke tedawî qebûl nêkerdo apey berdê hepisxane. Rixmo ke mîyan ra 6 rojî derbaz bîyê zî hîna tedawîya tepişteyan nêameya kerdene.

Keyeyê tepişteyanê ke şinê serdana înan vat, ê tersenê ke rewşa weşîye ya domananê înan xirabêr biba. Keyeyan waşt ke rêxistinê cimatî yê sîvîlî cade bikewê mîyanê têgêrayîşî. Keyeyan ard ziwan, ganî tedawîya înan dest pê bikera û vat, “Pêvînayîşê nê hewteyî de domananê ma vat, ‘seba ke şertê nêweşxaneyî hîjyenîk nêbîyê, ma tedawî qebûl nêkerde’. Domanê ma ameyê berdene bi Nêweşxaneyê Tibî yê Cigêrayîşî yê Dursun Odabaşi yê Yuzuncu Yilî. Waşto ke înan berê binê nêweşxaneyî, cayêk sey cêrzemîn de tedawî bikerê. Cayo ke seba tedawî tepişteyî berdê , cayêko bêhewa, bêpencera û zaf nemin bîyo. Rîyê nê şertan ra domananê ma tedawî qebûl nêkerda.”

Keyeyê tepişteyan seba ke hîna zî domanê înan nêameyê tedawîkerdene reaksîyon da û vat, “Ganî bêrê berdene bi nêweşxaneyêkê başî. Seba ke weşîya înan baş biba ganî rew bêrê tedawîkerdene. Ma keyeyê tepişteyan tim leyê domananê xo de yê. Eke hewca bikero ma do reyna vejînê meydanan. Êdî na bêhuqûqîye biqedênê û tedawîya domananê ma bikerê. Hetê bînî ra ganî rêxistinê cimatî yê sîvîlî rew bikewê mîyanê têgêrayîşî û prosesî teqîb bikerê.”