Bazirganîya narkotîk û fuhuşî de Wan Îstanbul û Adana ra dima bîyo şaristano hîrêyîn. Seba ke peyê ney de axayê tay eşîran, qoricî û çawişê pisporî est ê, bazirganîya narkotîk û fuhuşî bi rehetî Wan de yena kerdene.

Rixmo ke Wezîrê Karanê Zereyî yê Tirkîya Suleyman Soylu mengêke de reyêk Wanî zîyaret keno hema zî derheqê bazirganîya narkotîkî ya şaristanî de eşkerayîyêke nêdaya.

Wan de madeyê tîryakî û kundoxî (narkotîk) hetê qoricîyan ra yenê peydakerdene. Qoricîyî seba ke nênê kontrolkerdene bi hawayêkê rehetî nê madeyan şaristan û qezayanê ci de vila kenê.

Çend keyeyê ke terefgîrê dewlete yê, bi zirxê dewlete bazirganîya fuhuş û narkotîkî de rolêkê pîlî kay kenê. Keyeyê qoricîyan Kahraman û serqoricî Serekê AKPyî yê qezaya Şaxî Abdurrahman Şeylan nê keyeyan ra yê.

Nê keyeyê qoricîyan cayanê alkolî, otoparkan û kafeyan de narkotîkî roşenê, bi rayîrê narkotîkî cinîyan visnenê dafika fuhuşî û pê zorî bi nê cinîyan fuhuş kenê. Xora tay otoparkê ke tede narkotîk yeno peydakerdene û roşîyeno aîdê keyeyanê Şeylan û Kahramanî û tay 'axayan' ê. Tay kafeyan de bi hawayêkê eşkerayî fuhuş yeno kerdene. Coka şaristan de nêweşîya frengî zî se ra se zêdîyaye.

Birêxistinkerdişê bazirganîya narkotîkî hetê qoricîyan ra, ê fuhuşî hetê çawişanê pisporan ra yeno kerdene. Cinîyê ke keyeyî ra remenê û rewşa înan a madîye hol nîya, verî narkotîk dîyeno înan dima zî nê cinîyî pê kayan kewenê dafika fuhuşî. Nê serranê peyênan de bazirganîya fuhuşî ameye kiriştene salonanê masajî yê otêlan. Destûrnameyê nê salonan hetê Şaredarîya Rêya Armûşî ra dîyenê.

Mengêka hamnanî de sereştişê salonêka masajî ra dima eşkera bibi ke salone aîdê polîsêk û çawişêkê pisporî ya.

Bazirganîya fuhuşî de cinîyê xerîbî dafika sektorê fuhuşî de têrî benê.

Çend rojî verî 5 cinîyanê xerîban seba ke fuhuşî ra xo bixelisnê muracatê Dozgerîya Komare kerd la cinîyî seba ke sînorî ra bêrê teberkerdene teslîmê Mudirîya Îdareyê Koçî ameyî kerdene.