KCD,TJA, DBP, HDP, MED TUHAD-FEDî, OHD û Meclîsê Mayanê Haştîye vera tecrîdê girankerdeyî yê serê Rayberê Şarê Kurdî Abdullah Ocalanî Wan de rayraşîyayîşêk kerd. Polîsan hêrişê şarî kerd û  bi desan  kesî destbend kerdî.

Qismêkê şarî verê AVMyê Aydin Perihan de qismêko bîn zî Hîrgoşê Ezbercîlerî de ame têhet. Polîsan heme kuçeyî girewtî. Şarî bi slogana “Bijî berxwedana zindanan”  cewab da. Polîsan destur nêda şar rayra şiro. Polîsan pê bomayanê gazî û guleyanê plastîkan hêrişê şarî kerd û xeylêk kesî destbend kerdî. Cinîyêke xora şîye. Wekîlanê HDPyî vera polîsan nêrazîbîyayîş mojna.

Hetê bînî ra saetanê serê sibayî de  kuçeyê Cumhurîyet, Maraş û Kişla yê ke herêmê  rayşîyayîşî ye de heme rayîrî ameyî girewtene û helîkopteran bajarî serî ra firdayîşo nimz kerd. Sere de berê HDP û DBPyî verê heme dezgehan de polîsî ameyî cakerdene.

Grûbêke semedê protestokerdişê ablûqaya polîsan Kuçeyê Cumhurîyetî ra ver bi banê HDPyî rayra şîye. Rayraşîyayşo ke derûdorî ra şarî paştî daye ci de sloganê  “Bijî berxwedana Îmralîyê”, “Bijî berxwedana zindanan” ameyî eştene. Polîsan reyna pê gazê îsotî hêrişê şarî kerd.

40 kesê ke ameyî destbendkerdene ameyî berdene Mudirîya Polîsan a Bajarî . Wekîlê HDPyî yê ke xeylêk wext binê şîlî de mendî ravêrtî banê DBPyî.