Weçînayîşê 31’ê Adare bi eleqeyê şarî yê pîlî dest pêkerd. Şarê Wanî zî saetanê şewdirî de şi sindoqan ser û rayê xo eştî ci. Wan de hawayê weçînayîşî no dem sakîn o û bêvengîye esta. Yeno pawitene ke HDP do Wan de bi ferqê pîlî şaredarîyan qeyûman ra peyser bigîro. 

Avci: Serkewtiş ê şarî bo

Sîyasetmedarê HDP’yijî zî şîyî sindoqe ser û rayê xo eştî ci. Namzedê Şaredarîya Wanî ya Pîle Mustafa Avci zî qezaya Edremîtî, Dibistana Hîlmî Irakî de şi sindoqe ser û raya xo eşte ci. Mustafa Avciyî cieştişê raya xo ra ver wina qisey kerd: “Hukmatî heqê weçînayîş û weçînitoxîya şarî binpay kerd û bi xesp, bi tedayan, bi astengîye îradeyê şarî çinê hesibna. La ewro şarê ma do reyna bibo serkewte. Wa bixeyr bo.”

Ozgokçeye: Wa wa û biratîye û haştîye rê bibo wesîle

Namzeda Şaredarîya Wanî ya Pîle Bedîa Ozgokçeye zî Lîseya Kazim Karabekîrî de şîye sindoqe ser û raya xo eşte ci. Ozgokçeye cieştişê raya xo ra ver wina va: “Ez wazena ke weçînayîş wa û biratîye û haştîye rê bibo wesîle. Ez seba pêroyê cinîyan û domanan raya xo erzena ci. Wa bixeyr bo.”