Wan û Agiri yê ke sînorê Îranî de yê panîkê virusê Korona esto. Wezîrîya Karanê Zereyî û ya Weşîye yê Tirkîya dabi zanayene ke Tirkîya de virusê Korona çîn o la eşkerayo ke no virus resayo Agirî û Wan.

Berê Gurbulakî yê qezaya Bazîdî yê Agirî de heta nika 650 kesî bi şikê virusê Korona gerîyayî binê tedawî. Bitaybetî zî 14 ramitoxê tiran ê ke Îran ra ameyî bi teşîsê vîrusê Korona Nêweşxaneyê Yenîşehîrî yê Bazidî de gerîyayî binê karantîna. Sinor de xeymî ameyî ronayene. Nizdê 700 ramitoxan hetê Îranî de mehsur mendî. Ewro zî kesêko Îran ra ravêrtêne Tirkîya bêrê sinorî yê Gurbulakî bi şikê Korona ame berdene nêweşxane. Bêrê sinorî yê Gurbulakî hefteyo ravêrte hetê hukmatî ra amebi qefilnayene.

Reyna Wan de zî panîko gird esto. Rixmo ke bêrê sinorî yê Kapikoyî hewteyo revêrte amebi qefilnayene nêweşxaneyo leşkerî sey nêweşxaneyê karantîna ame îlankerdene. Reyna Nêweşxaneyê Herême yê Perwerde û Cigêrayîşî yê Wanî de zî katê 3,4 û 5an sey cayê karantîna ameyî îlankerdene.

Hetê bînî ra Wan de esnefan Korona ver kepenkî qefilnayî û fîyatê maskeyan 5 TL ra bi 150 TL. Goreyê zanayîşanê ke Nêweşxaneyê Herême yê Perwerde û Cigêrayîşî yê Wanî ra resayî tayî çîyî şarî ra yenê nimitene. Kesê ke şikê Korona esto berê peyênî yê nêweşxaneyî ra yenê remnayene û yenê berdene nêweşxaneyê leşkerî.