Hemşaredarê HDPyî yê Halfelîya Îdirî Hasan Saya vizêr amebi destbendkerdene û dest nîya wezîfeyê ci ser. Avûkatê ey şi zîyaretê Safayî. Ame parekerdene ke wextê nezaretê Safayî qasê 4 rojan ame dergkerdene.

Avûkat Haydar Mizrakî Fermandarîya Censirmeyan a Îdirî de şi zîyaretê muwekîlê xo Safa. Mizrakî da zanayene ke verî ke dest nîya wezîfeyê Safayî ser Hetkarê Walîyê Îdirî venga Safayî da û bira ''destsernayîşê wezîfeyî'' ci rê vate. Mizrakî bale ante nê çîyî ser ke hetkarê Walîyî Safayî ra waşto ke wa ''mesajêko ke şar aram keno'' bido. Semedo ke Safayî no waştiş red kerd ame destbendkerdene.