Vervatoxê Artêşa Neteweyîye ya Lîbya Ehmed Mismarîyî pare kerdbi ke 4 Pêşmergeyên Roj ê ke Hewlêr de hetê artêşa tirke ra amebî perwerdekerdene Lîbya de ameyî tepiştene. Wekîlê YNKyî yê Herêma Federale ya Kurdîstanî Serko Azad Gelalîyî mesajêk pêşkêşê Serekatîya Parlamentoya Herêma Kurdîstanî kerd.

Gelalîyî mesajê xo de vist vîrî ke Pêşmergeyê  Rojawanî 12ê nîsana 2016î de pê bira Mesud Barzanîyî ameyî ronayene û 6 hezar kesî ra yenê meydan. Gelalîyî mesajê xo de persa ke rîxmo ke nê pêşmergeyî legal nîyê senî meaş gênê. Gelalîyî mesajê xo de vat: ''Pêşmergeyê Rojawanî rojawanij ê û pabesteyê ENKSî yê. KDPyî paştî û çeke dayî înan. Wexto ke artêşa dewleta tirke hêrişê Rojawanî kerd, nê pêşmergeyan Kobanê û Efrîn nêpawit. Ganî eşkerayîya Mîsmarîyî bêrê cigêrayene û derheqê nê pêşmergeyan de tehqîqat bêro akerdene. Ganî nê hêzî bêrê tafîyekerdene û Rojawanî ra bêrê erşawitene. Nê kesî nameyê kurdan û pêşmergeyan herimnenê û herême de sey cergî yenê şinasnayene.  Nameyê pêşmergeyî fîraz o. Pêşmergeyî welatperwer, neteweperwer, azadîwaştox ê. Ganî wina nêrê namerkerdene.''