Warê Werxelê yê Avaşînî  7ê hezîrane ra nata şahîdîya hêrişêkê bêexlaqî û xoverdayîşê gerîlayan keno. Gerîlayê ke vera pêro şert û mercanê tewr girnan şer kenê çeperanê xo ra fek vera nêdanê, plananê dişmenî yê serê Herêmanê Pawitişî yê Medya çin kenê. Artêşa tirke ya îşxalkere fam kerd ke payîzî ra verî nêeşkena nê warî îşxal bikera coka vera warî pêro teknîkî, çekan, gaz, teqaberan xebitnena. La nê zî heta nika pê gerîlayan nêeşkayî.

Bi taybetî 20ê êlule ra nata waranê Werxelê de vera gerîlayan hêrişê neweyî dîyayî destpêkerdene. Vera tunelanê şerî teqaberî û gazê kîmyewî şuxilîyenê. Nê gazê kîmyewî dûrî ra yenê hîskerdene û eşnawitene. Nê hêrişî eşkera kenê ke artêşa tirke barbarîye de sînoran nêşinasnena.

Dîmenê ke kameraya gerîlayan 2ê teşrîna verêne de qeyd kerdê, mojnenê ke teqaberê çetinî senî xesar danê herême. Dîmenan de aseno le leşkerê tirkî teqaberanê bi 70 kîloyan erzenê fekê tunelan. Artêşa îşxalkere semedo ke gerîlayî nêvejîyê teberî dafikan û teqaberan fekê tunelan de ca kenê. Gerîlayan bi desan reyî nê teqaberî îmha kerdî, vejîyayî teber û derbî dayî leşkeranê tirkan ro.

Komêka gerîlayan tunelanê şerî yê Werxelê de çar mengan ra zêdêr o pê taktîkanê neweyan hêrişan şiknenê û nameyanê xo xoverdayîşê pîlî de nusenê.