Xalfetî de vera destsernayîşê îradeyî roja hewtine de xoverdayîş dewam keno. Rixmê gefanê hêrişan ê polîsan zî şar xoverdayîş de qerardar o. Şarî serê sibayî verê şaredarîya ablûqakerde de pankarta ''Vera xespkerdişê îradeyî ma do xoverdayîşî ser bivisnê'' û ''Qeyûm ney demokrasî'' akerde. Polîsan bi bahaneya qedexeyê walîtîye û pankartan şarî rê gef werd.

Hemserekê DEM Partî yê Riha Bekir Karakeçîlîyî vat ke ê xoverdayîşê xo rê dewam bikerê.

Hemwelatîyêkî verê polîsan de vat: ''Qeyûm xespkerdişê îradeyî yo.''

Hemwelatîyêkê bînî polîsan rê vat ke destbendkerdeyan rê îşkence ameyo kerdene. Polîsêkî pers kerd ke ''Raporê derbkerdişî ça de yo?'' Hemşaredara Xalfetî Sanîye Bayram wina cewab da: ''Çend rojî verî şima ma derb kerdî, rêçê şima destê mi de yo.''

Sanîye dima bi pankarta xo verê polîsan de ronişte.

Wekîlê DEM Partî Ferît Şenyaşarî zî vat: ''Şaredarîya ma ameya xespkerdene. Hêzê asayîşî sûcî kenê. Ma do vera xespkerdiş û mudaxelekerdişî îradeyê xo bipawê.''

Karakeçîyî venga walîyê Riha da û vat: ''Ti temsîlkarêkê partîyan nîyî. Bira qedexekerdişî îlegal a. Ma ra yew ten zî bimano, ma do heqê şarê xo bipawê.''

Hemwelatîyan vat ke ê do verê şaredarîye de xoverdayîşî rê dewam bikerê.