Qezaya Xelfetî ya Riha de, operasyonê dimayê pêkewtişî dewam keno. Taxanê Dergîlî, Sirataşlar, Kosarda û Kantarma yê qeza de sereştişê keyeyan de xeylî kesî ameyî destbendkerdene. Kesê ke ameyê destbendkerdene ameyî berdene bi Fermandarîya Cendirmeyan a Qeza. Taxa ke pêkewtiş qewemîyayo de, ablûqaya polîsan dewam kena û yeno vatene, dorê keyeyo ke pêkewtiş qewemîyayo bi barîyeran ameyo girewtene.

Taxa Sirataşlarî ya Xelfetî de, weçînayîşanê 31'ê Adare de namzedê HDP'yî yê Şaredarîya Xelfetî Abdullah Çîftçî zî mîyan de xeylî kesî ameybî destbendkerdene. Nameyê kesanê ke vizêrî ameyê destbendkerdene: Zekî Alakûş, Gazal Alakûşe, Guler Alakûşe, Mehmet Alakûş, Rabî Alakûş, Fahrî Alakûş, Hanim Alakûşe, Abdullah Çîtçî, Abdullah Boga, Kemal Şahîn, keso ke nameyê ci Erdal o û peynameyê ci nêameyo musayene, Ahmet Korkmaz û Mehmet Korkmaz.

Keyeyo ke hêzanê rejîmê Tirkî eşto ser, çî-mîyê elektronîkî ameyî destsernayene. Yeno vatene, kesê ke ameyê destbendkerdene bi ci îşkencê ameyo kerdene.