Dewanê Tarî, Herdîf, Kûmik û deweka Maskanî yê qezaya Xolxolî yê Çewlîgî de 7ê çeleyî ra nata rayîrî rîyê vewre ra girewte yê. Wekîlê HDPyî yê Dêrsimî Alîcan Onlu babete kirişte rojemê meclîsî.

Onluyî vat: ''Seba ke rayîr girewte yê, şar neêşekno heywananê xo rê debir bîgêro. Coka hewyanî qîmkerde nînê weyekerdene. Xeylêk hewyanî telef bîyî û leyîrê înan ver şîyî.''

Onluyî ard ziwan ke sereyê serre ra ceyranê dewijan zî çîn o û vat: ''Makîneyê sey cemed, kincan û şit ditişî zî nêxibityenê.''

Onluyî derheqê problemanê ke qewimîyenê de vernîyazê persî teqdîmê meclîsî kerd û waşt wa Wezîrê Karanê Zereyî Suleyman Soylu cewabê  nê persanê bido:

Sebebê ci çî yo ke çar aşmî yo rayîrê dewan nînê akerdene?

Semedê akerdişê rayîrî û xizmetê ceyranî xebatî yenê kerdene?  Eke ya nê xebatî çî yê? Eke ney sebebê ci çî yo?

Seba ke rayîrî qefilnaye mendî dewijan zaf tengayî antî, semedê wedaritşê mexdûrîyetê dewijan xebatêka şima est a?

Çewlîg û Xolxol de çend dozerî est ê û çend operatorî tîya xebityenê?

Butçeya Îdareyê Taybetî yê Çewlîg û Xolxolî çend a? çendê ci sey serrane semedê problemanê dewijan yeno xerckerdene.

Eke nê dewî bibestîye qezaya Qislê ya Dêrsimî xizmetê înan holêr nêbeno?