Hemsereka Konseya Rayberdişî ya KCKyî Besê Xozat cewab da persanê Yeni Ozgur Politika û rojdem ercna. 

Beşo diyîn ê roportajê Xozate bi kilmî wina yo:

''Tirkîya şerê Ukrayna-Rûsya de hetê NATOyî yanî hetê Ukrayna girewt. Çunke Tirkîya qirkerdişê kurdan de hewceyê destekê NATOyî yo. Hetê bînî ra Tirkîya no şer xo rê sey firsendêk dî û hêrişê Zapî kerd. Heta nika Ewropa û Amerîka tewirêk nêmojna nê hêrişan. La nê vera Rûsya cade qisey kerd. No zî dîrîtîya Ewropa û Amerîka eşkera keno. Dewleta tirke ha vera gerîlayan çeka kîmyewîyew şuxilnena. Senî ke hêrişê vera Rojawanî bi destûrê Amerîka ameyî kerdene, hêrişê vera Başûrî zî bi destûrê Amerîka yenê kerdene. Eke Amerîka biwaza warê hewayî yê Iraqî Tirkîya rê qefilnena la wina nêkena. Çunke Amerîka zî wazena ke PKK bêro tasfîyekerdene.

Hukmatê Kazimîyî waştişê Tirkîya û PDKyî ser o hêrişê Şingalî keno, mabênê Rojawan-Şingalî de dêsî virazeno û pê têlan gêno. No dês dewamê dêsê mabênê Tirkîya-Rojawanî yo. Hukmatê Kazimîyî pê hêrişê Şingalî hem îdareyê Şingalî rê teda keno hem zî hêrişanê Tirkîya yê vera Başûrî meşrû keno hem zî keno ke îradeyê Şingalî, Asayîşê Êzidxanî, hêzanê YBŞ-YJŞyî teslîm bigêro. Hukmatê Kazimîyî mabênê şarê Iraqî û şarê Şingalî de dişmenîye virazeno la na dişmenîye do zerar bida Iraqî. Êzidîyî 74 reyî raştê fermanî ameyê. Tewr peyêne zî ê raştê fermanê DAÎŞî ameyî. Iraq û PDK mesuldarê nê fermanê peyênî yê û ganî hesabê ci bidê. Rexnedayîşê tewr raştikên ê Iraqî şinasnayîşê Îdareyê Xoserî yê Şingalî yo.

Şarê Şingalî bi tewirêkê rûmetênî vera nê hêrişan hetê hêzanê xo de ca girewt. Êzidîyî do heta peynî azadî, estbîyayîş û xoserîya xo bipawê û hesabanê PDKyî pûç bikerê. PDK kampan de tedaya êzidîyan keno û êzidîyan seba rayan sey çeke şuxilneno. PDK wextanê peyênan de zî Vîyane Daxil keno objeyê xo. Ganî Vîyane Daxil destûr nêda ney. 

Îqtîdarê AKP-MHPyî seba planê xo yê weçînayîşî nê hêrişê peyênî dayî destpêkerdene. Eke ê ser bikewê do şorê weçînayîşî. Serra 2023yî serra peyêne ya Peymana Lozanî ya ke na peymane Kurdîstan kerd çar parçeyî û înha û înkarê kurdan qebul kerd û serrgêra ronîyayîşê dewleta tirke ya faşîst a. Îqtîdarê AKP-MHPyî keno ke qirkerdişê kurdan temam bikero û bi nê hawayî weçînayîşan de ser bikewo. Hêrişanê vera Zapî yê 17ê Nîsane parçeyê nê planan o. Nê hêrişî armanc kenê ke kurdan qir bikerê, Başûr û Rojawanî îşxal bikerê.

Dewaya qefilnayîşê HDPyî  parçeyêkê planê qirkerdişê kurdan û awankerdişê dîktatorîya faşîste yo. Partîyê sey CHP, ÎYÎ Partî, Gelecek, Deva û ê bînî vera hêrişanê îşxal û qirkerdişî bêveng ê û plananê 2023yî tesdîq kenê. Îqtîdarê AKP-MHPyî pê qefilnayîşê HDPyî wazeno dîktatorîyêke awan bikero. Muxalefeto demokratîk ganî yew bibo û vera ney hêzê xo bimojno. CHP û ÎYÎ Partî xora sey boçikê îqtîdarî têgêrenê. Mabênê înan de yew ferq çin o. Çareserîye Îtîfaqê Demokrasî yo ke serkêşîya ci HDP keno. Ne qefilnayîşê HDPyî ne zî hêrişê îşxalê Zapî do nêeşkê îqtîdarê faşîstî bixelisnê.

Beşo pîlêr ê komelê Tirkîya faşîst û nîjadperest o. Coka no komel şerê Kurdîstanî nêvîneno, heta pê çepikan paştî dano ci. Nika komelê Tirkîya binê vêşanîye û xizanîye de yo. Tirkîya de pêro çimeyê zengînîye yenê dayene şerê vera kurdan. Bingeyê krîzê ekonomîkî şerê vera kurdan o. La komelo faşîst ancî zî paştî dano polîtîkayanê şerî. Hetê bînî ra hem Tirkîya de hem zî Vakurê Kurdîstanî de ekolojî û xoza yenê talankerdene. Awbendî, HESî, ocaxê madenî her ca de yê; daristanî yenê qirkerdene. Eke şero psîkolojîk ê vera komelî bêro pûçkerdene komel do şîyar bibo û xo ver bido. Eke potansîyelê demokrasî yê Tirkîya bêro eşkerakerdene do no îqtîdar birijîyo, verê çareserîye abibo, azadîya Rayber Apoyî bêra caardene û sere de meseleya kurdan pêro meseleyî bêrê çareserkerdene.

Nika mabênê dewleta tirke û gerîlayan de şerêko winasên est o ke no şer do çarenusî eşkera bikero, şiklêkî bido ameyoxê kurdan. Eke kurdî ser bikewê îqtîdar do birijîyo. Gerîlayî vera hêrişan bi hawayêkê bêhempayî xo ver danê. Gerîlayê YJA-Starî asta tewr berze de tewrê şerî benê û morê xo danê binê şerî. Ma do serkêşîya cinîyan de ser bikewê, Kurdîstanî azad bikerê û Tirkîya û Rojhelatê Mîyanênî demokratîk bikerê. 

Şarê ma zî serkêşîya cinîyan de vera hêrişan payan ser de yo. La ganî şarê ma vera nê dişmenî xoverdayîşêkê topyekûnî bikero. Şarê ma yê Ewropa ganî hêz û potansîyelê xo hîna bi tesîrî û aktîfî bişuxilno. Cinî û ciwanî zî ganî çalakîyan de rolê xo hîna bi hawayêkê aktîfî bîyarê ca. Şarê ma ganî şarê Ewropa zî tewrê nê çalakîyan  bikero, dostanê xo bizêdîno, îtîfaqanê stratejîkan bikero.''