Artêşa tirke 2yê temmuze de Xîzanê Bedlîsî de Harat, Akûnûs, Govan, Nanîlan, Xalepûr, Kekulan Sureh, Pertavan, Kûran û Ureh girewtbî binê ablûqa û qedexeyê tebervejîyayîşî îlan kerdbî. Dima zî nê cayî sey 'herêma asayîşê taybetî' ameyî îlankerdene. Erdê şarî, baxçeyê meyweyan û findeqan hetê leşkeran ra yenê talankerdene. Qeymeqamê Xîzanî vat ke 'ma dest nayo pêro daran ser.' Dewijî anê ziwan ke dewlete armanc kena ke herême veng bikera. Nê dewî 1994 de zî ameybî vengkerdene  la dima bi qanûnan dewijî agêrabî. 

Wekîlê Partîya Çep a Keske yê Bedlîsî Huseyîn Olanî derheqê babete de agahîye daye û dîyar kerd ke îlankerdişê herêma asayîşê taybetî do heta 28ê temmuze dewam bikero. Olanî pare kerd ke bi taybetî dewa Xalepûrî de ablûqayêka pîle est a û dîyar kerd ke şewe û rojan hawanî erzîyenê dewan ser. 

Olanî vat: ''Ma vînenê ke ê wazenê ke dewijan herême ra vejê. Wina aseno ke operasyono leşkerî zî do dewam bikero. Bi bahaneya operasyonî herême yeno vengkerdene, bax û baxçeyî wêran benê. Seba ke embarê awe yenê xerakerdene, bax zî bêawe manenê. Dewijî tim mexdûr benê. Qeymeqamî bi xo dewijan rê vato ke ê dest nanê pêro cayan ser. Şewe topê hewanî û guleyî erzîyenê. Bombayê ke nêteqîyenê seba dewijan tehlukeyê pîlî yê. Leşkerî vanê ke ê do tîya asayî bikerê la wina nêaseno. Ganî dewijî mexdûr nêbê.

Operasyonî ra semed zerar dîyeno ekolojî û kuleyanê nobete rê her ca wişk beno. Ma na babete berde Meclîsî û ma persnameyêk amade kerd. Ma xîret kerd ke bi hetkatê Wezîrê Karanê Zereyî pêvînayîş bikerê la cewab nêda ma. Ma waşt ke xo biresnê Walîyê Bedlîsî la ey zî ma red kerdî. Ma nêeşkenê muxatabêkî/e bivînê. Ma înan rê vat ke ganî waştişnameyê nuştekîyî bidê dewijan.''