Janê vîrusê Korona sey pêro dinya Tirkîya de zî vila beno. Seba ke hukmatê AKPyî Tirkîya û Vakurê Kurdîstanî de tedbîranê qîman nêgêno, hûmara qurbanan bena zêdêr.

Rîzmê kêmasîya sîstemê perwerdeyî ya şaristanê Kurdîstanî hukmatê AKPyî na babete de çîyêk nêkeno. Kurdîstan de şar vera vîrusê Korona têkoşîn keno, dewlete zî operasyonanê leşkerîyan kena. Hukmatê AKPyî her roje bi seyan leşkeran erşaweno Colemêrg û qezayanê ci.

Yeno vatene leşkerê ke yenê merkezê Colemêrgî, qezayanê Gever, Şemzînan û Çelê hetê weşîye ra nênê kontrolkerdene. Yeno vatene ke tay leşkerî ameyî Colemêrg û pê vîrusê Korona kewtî. Seba ke leşkerê nêweşî mîyanê leşkeranê bînan de yê û dekewenê mîyanê şarî, naye ra Colemêrg de şar qerqilîyeno. Yeno vatene ke mîyanê yewîna leşkerîye ya qezaya Geverî ya Colemêrgî de ke 200 leşkeran ra yena meydan 11 leşkerî pê vîrusê Korona kewtî. Leşkerê ke pê vîrusê Korona kewtî kamp û otêlan de ameyî cadayene. Na rewşe zî bîye semedê nêrazîbîyayîşî û panîkî.

Kesêkê colemêrgijî vera na rewşe nêrazîbîyayîşê xo mojna û vat: ''Herinda ke înan leşkerî bigirewtêne binê karantîna, leşkerî mîyanê ma de gêrênê. Leşkerî do nêweşîye vila bikerê. çunke tîya de tedbîrêk nêame girewtene. Leşkerê ke şaristan de ameyî cadayene ganî cade yewinanê xo de bigêrîyê binê karantîna.''