Dinya xîret kena ke verê vîrusê Korona bigêra la dewleta tirke îşxalkerdişan  dewam kena.Şaredarîya Êlihî û şaredarîyê Erxanî, Farqîn, Licê û Gêlî yê Amedî yê HDPyî ameyî destsernayene.

Şaredarîya Erxenî de ke qeymeqamê ci sey qeyûm ame tayînkerdene cigêrayîş dewam keno. Polîsan eşt keyeyê Hemşaredar Ahmet Kayayî ser û o berd Mudirîya Asayîşî. Hemşaredare Meryeme Yildiz û endamê meclîsê şaredarîye verê bîna de ameyî vindertene û polîsan destûr nêda ke ê derbazê bînaya şaredarîye bibê. Hemşaredare Yildize ard ziwan ke şarê Erxenî destsernayîşê îradeyê xo qebul nêkeno. Yildize îfade kerd ke ê hemşaredar ê la nêeşkenê bikewê zereyê bîna û vat ke AKPyî krîzê vîrusê Korona zî xo rê sey firsend dî. Yildize vat: ''AKPyo ke ganî vera vîrusê Korona têkoşîn bikero, vera îradeyê şarê kurdî şer keno. Şarê Tirkîya hesabê ney do biperso.''