Fermandarîya Qerargehê Merkezî ya YJA-Starî sere de cinî û ciwanî venga pêro kesan da ke vera sûcanê şerî yê dewleta tirke ya faşîste, hemkaranê ci esasê têkoşînê topyekûnî de tewirê hîna radîkalî bigêrê.
Fermandarîya Qerargehê Merkezî ya YJA-Starî derheqê hêrişanê kîmyewîyan ê dewleta tirke ya faşîste de eşkerayîyêke daye. Eşkerayîye wina ya:
''Ma embazanê xo yê şehîdanê ke Hemleyanê Bazanê Zagrosî û Cengê Xabûrî de şehîd bîyê bi rêzdarî û minetî yad kenê û soz danê ke armancanê înan do bîyarê ca. Hetê bînî ra ma 17 embazanê xo yê ke di menganê peyênan de hêrişanê kîmyewîyan ê dewleta tirke de şehîd bîyê bi şukranî yad kenê. Ma soz danê ke bedelê ci se beno wa bibo ma do qesasê înan bigêrê, sere de keyeyanê înan ê ercîyayeyan pêro şarê xo yê welatperwerî û embazan rê serweşîye wazenê.
Polîtîkayê îmha yê dewleta tirke ya faşîste paştgîrê ci yê wayîrê sîstemê kapîtalîstî do qetî vera têkoşînê cinîyan û şaran de bin bikewê. Dewleta tirke ya faşîste û hemkarê ci do qetî Kurdîstanî ra bêrê defkerdene. Bêguman artêşa ma ya cinîyan xeta Bêrîtane de, bi ferasetê çalakîya Rûkene û Sara qetî şora serê dişmenî û îşxalkeran bin bikera. Têkoşînê ma yê cinîyan senî ke Şingal de DAÎŞ bin vist, Rojhelat de rejîmê molayan, Başûr de sîstemê îxanetî, Vakur de zî dewleta faşîste do bin bivisno û Kurdîstan de cuya têdûşte, ekolojîke, demokratîke û azadîgîrîya cinîyan awan bikero. Ma sey artêşa cinîyan ê azadan a Kurdîstanî bi hêzê Rayberîya xo, tecrubeyanê xo, qerardarîya xo ya azadîye û hêrsê xo yê vera dişmenî eşkenê sîstemê serdestîya camêrdan birijnê.
Şarê ma yo ercîyaye;
Têkoşînê ma yê azadîye sînorî derbaz kerdî û pêro dinya de bi tewirêk, pêro cinîyî şîarê 'jin, jiyan, azadî' de ameyî pêser û tewrê serewedaritişî bîyî. Rixmê tecrîdê Îmraliyî yê 25 serran zî Rayberê ma beno hêvîya, şar, cinî û ciwanan, cinîyanê Kurdîstan û dinya keno wayîrê ferasetî, moral û cesaret dano. Na enerjîya bêpeynî ya Rayberê ma û îradeyê şerî yê gerîlayan dewleta tirke gêj kenê coka dewleta tirke ya faşîste dest erzena çekanê kîmyewîyan. Na dewleta ke şeş mengî yo Zap, Avaşîn û Metîna de teng bîya, di mengî yo zî giranîye dana çekanê kîmyewî û nukleran ke waranê îşxalî de têbigêra. Destpêkê hêrişan ra nata detayê şerî şarî rê yenê parekerdene û yeno îfadekerdene ke dewleta tirke nê hêrişan de bombaya nuklere, termobarîk û çekanê kîmyewîyan şuxilnena. Reyna ame îfadekerdene ke dewleta tirke bi destekê PDKyî eşkena hende hêrişanê kîmyewîyan bikera û venga şarê ma dîya ke vera îxanetê PDKyî tewirêkî bigêro. Şarê ma ra ame waştene ke vera hêrişanê kîmyewîyan ê dewleta tirke û îxanetê PDKyî tewirêkê qetî bigêro.
Hetê bînî ra dewleta tirke ya faşîste bi destek û bêvengîya warê mîyanneteweyî di menganê peyênan de hêrişê kîmyewîyî giran kerdî. Seke ame eşkerakerdene nê di mengan de 17 embazê ma pê çekanê kîmyewîyan şehîd bîyê. Şehadetê înan raştîya kîmyewîye bi zelalî mojnenê. Şar û dostê ma bîyê şahidê ci ke embaze Helbeste Koçerîn û Baz Mordem senî pê çekanê kîmyewîyan nefesê xo yo peyên dayo. Embazê ma zî bîyê şahîdê ci ke embaz Baz û embaze Helbeste senî pê xo bawer, qerardar û gonîserdin ê. Bi nê hawayî wijdanê komelî rê dîya zanayene ke no şer kamyew şertan ser de yeno kerdene, gerîlayî senî têkoşîn kenê. Nê dîmenî reyna mojnenê ke kam terorîst o, neheq o, qirker û bêexlaq o.
Wa bizanîyo ke ma rê zî giran o ke ma nê dîmenî pêşkêşê şarê xo û rayaumûmîye kerdê. La ma zanenê ke eql, wijdan û exlaqê nê çaxî çiman ra derbaz benê. Sîstemê serdestîya camêrdan şexsê xoperest, şexsî kor, kerr û lalî awan kerdî. Sîstemê netewe-dewlete sîstemê xo înkar û îmhayê Kurdîstanî ser o na ro. Rixmê di şeranê dinya zî dişmenîya vera kurdan û Kurdîstanî nêvurîyaye. Pê terorî morkerdişê PKKyî, tecrîdkerdişê Rayberê ma, îşxalê Kurdîstanî, destekê bi qirkerdişê kurdan, bêvengîya vera hêrişanê kîmyewîyan ê serê gerîlayan zî îsbatê ney ê.
Nê çekê qedexekerdeyî eke cayêkê bînî de bişuxilîyê sere de OPCW û Neteweyê Yewbîyayeyî (NY) pêro dezgehê asayîşî do qîyamet ronê. Çekê kîmyewîyî seserra 20. de bi hawayêkê sîstematîkî vera kurdan şuxilîyayî. 1920 de vera têgêrayîşê kurdan ê bi serkêşîya Şêx Mehmud Berzencî, 1988 de vera şarê Helebçe û vera têgêrayîşê ma destpêkî ra nata şuxilîyayî.
No şerê îmha yê vera gerîlayan û kurdan ganî qetî nêro normalîzekerdene. 50 serrî yo serkêşîya PKKyî de têkoşînê azadîye yeno kerdene, komelbîyayîşêko newe ameyo awankerdene. Seba ney zî bi des hezaran şehîdî ameyî dayene, bedelê pîlî dîyayî, fedakarîyê pîlî ameyî kerdene, kedê giranî ameyî dayene. Têna şerê vera DAÎŞî de nêzdîyê 15 hezar şehîdî dîyayî û merdimîye belaya DAÎŞî ra ameye xelisnayene. Wa hêzê kapîtalîstî û îşxalkerê Kurdîstanî bizanê ke bedelê ci çi beno wa bibo ma do bidê la dewaya xo ra, têkoşînê xo ra fek vera medê. Welatê ma û Rayberê ma ma rê çimeyê hêzî û sebebê estbîyayîşî yê. Ma bi nê ferasetî do têkoşîn bikerê. Sere de cinî û ciwanî ma venga şarê xo yê welatoperwerî, dostanê xo, rayaumûmîya demokratîke danê ke vera sûcanê şerî yê na dewleta faşîste, hemkaranê ci yê xayînan esasê têkoşînê topyekûnî de tewirêkê hîna radîkalî bigêrê.''
