Fermandarîya Yewîyanê Pawitişê Şarî (YPG) bi  wesîleya 1ê Teşrîna Verêne Roja Kobanê ya Dinya eşkerayîya nuştekîye daye û nê vatî:

"Ma Roja Kobanê ya Dinya pîroz kenê ke xoverdayîş, fedakarîye û ruhê azadîye yo ke nêşikîyeno temsîl kena. Xoverdayîşê tarîxî yê Kobanê 10 serrî xo dima verdayî. Ma qerardar ê ke Kobanê heta peynî bipawê ke bîya sembola cesaret û anorê merdimîye yê dinya.

Xoverdayîşê Kobanê têkoşînê vera DAÎŞî ra wetêr bi; vera tarîtîya merdimîye sîmgeyê  têkoşînê pawitişê erjanê bingeyînan ê pîya ciwîyayîşî yê sey hêvî, azadîye, yewîye bi. Şervanê ma yê qehremanê ke erme bi erme pîya têkoşîn kerd mojna ra ke xoverdayîş têna semedê serkewtişê leşkerî nîyo, semedê pawitişê anorê merdiman o.

Roja ma de tehdîtê vera şorişê ma dewam kenê. Hêzê îşxalkerî û hemkarê înan cehd kenê ke modelê xoîdarkerdişê demokratîkî yo ke ma nayo ro, çîn bikerê. La wa no bêro zanayene ke ma do bi hewayêkê qerararî destketeyanê xo bipawê ke bi bedelanê girdan ameyî destfînayene. Na çarçewa de ma komelê mîyanneteweyî rê nê vanê: Kobanê xo ser yew xoverdayîş nêbi û peynîya têkoşînî nêbî. Têkoşîno ke Kobanê de resa tîtikî ewro dewam keno.

Vera hêrişan û tehdîtanê vera komel û şorişê ma têkoşînê ma sey 10 seran verî ewro zî wina muhîm o. DAÎŞ bi fîzîkî bin bikewo zî îdeolojîya ci hema tehdîtêko gird o. Hêzê herêmî yê sey dewleta tirke ya îşxalkere semedê çînkerdişê şorişê ma û modelê îdareyê xoserî yê demokratîkî mîyan paştî danê DAÎŞ û çeteyanê bînan. Bêvengîya komelê mîyanneteweyîyî hêz dano ê hetanê ke wazenê newera na îdeolojîya tarî ganî bikerê.

Ma têna qale de nê, ma do şehîdanê xo bi çalakîyan yad bikerê. Ma bi hîrakerdişê binawanîyanê xo yê komelkî, perwerdekerdişê ciwananê xo, pawitişê herra xo vera şîdet û zulmê dewleta tirke, DAÎŞ û mutefîkanê înan mesajê alternatîfê demokratîkî vila kenê. Ma sozê xo newe kenê ke ma do şorişê xo û destkewteyanê xo yê sey Îdareyê Xoserî bipawê. Ma reyna Roja  Kobanê ya Dinya pîroz kenê.''