Tepişteyê dewaya Nisêbînî Sîraç Yukseko ke Zîndanê Girewteyî yê Hûmara 2’yinî yê Tîpê T’yî yê Osmanîye de seba protestokerdişê tecrîdê serê Rayberê Şarê Kurdî Abdullah Ocalanî çalakîya fedaîye viraştebî, cenazaya ê qezaya Nisêbînî ya Mêrdînî de amî definkerdene.

Cenazaya ke binê tedbîranê kesifan de Sazîya Tibê Edlî (ATK) yê Adanayî ra gîrîyaye hetê parlamenterê HDP’yî Tûma Çelîkî, tayê merdimanê tepişteyan û xeylî îdarekaranê HDP û DBP’yijan ra ameye pêşwazîkerdene. Cenazaya Yuksekî sere de amî berdene bi Camîya Haci Huseyîn Çetînî û dima ra zî amî berdene bi Goristanê Morîsî.  

Cenazaya Yuksekî dimayê bicaardişê wecîbeyanê dînîyan ra amî definkerdene. Hêzanê dewleta Tirkî teberê ferdanê keyeyî de destûr nêda ke çew tewrê merasime cenaza bibo. Grûba ke verê goristanî de resabî pê û waşt ke tewrê cenaza bibo zî vernîya înan hetê polîsan ra amî girewtene. Mabênê grûba ke vere berê goristanî de resabî pê û polîsan de munaqeşe virazîya.

Grûba ke dimayê definkerdişî ra zî verê berê goristanî de vindertebî, pîya bi keyeyê Yuksekî seba şînî şîye Mehlaya 8’ê Adare.