Cayê ke grevê vêşanîye yê ke rayberîya Leyla Guvene de ameyî destpêkerdene, vila bene ra yew zî Başûrê Kurdîstanî yo. Hewlêr de Nasir Yagiz, Mexmûr de Fadîle Toke û Kelar de Herêm Mehmûd grevê vêşanîye bêdem-bêagêrayîşî de yê. Hetê bînî ra 14’ê Gulane de Silemanî de Merwan Memduh Ozdemîrî dest bi rojeyê mergî kerd.

Bi nameye xoverdayoxanê Zîndanê Wanî Sînan Dayanî  Merwan Meduh Ozdemîrî rê mektubek şawit çalakîya ey silam kerd û nê e vatî:’’ Grûba verêne ke tîya dest bi grevê vêşanîye kerde, çalakîya înan kewta roja xo ya 150’ine rewşa weşîyê înan krîtîk a. Tayî embazê ma bê paştdayîşî nêeşkenê wirzê we. Vîndîkerdişê kiloyî 20 ra ravêrto.  Ma yê ke grûba dîyine de yê kewtê roja 76’ine. Ma de zî 15-20 kilo vîndîkerdiş esto. Problemê weşîye çend şino zêdîyenê. Rojeyê mergî zî kewt roja 15’ine  rewşa nê embazan bîya giran. Çi heyfo ke  înan ra xeberê hole nênî. Şehadetî yenê pawitene. La bedelê ci beno wa bibo ma do tecrîdî bişiknê. Serkewtiş tewr peynî do ê ma xoverdayoxan bo.’’