Zîndanê Îslahîye de grevê vêşanîye yo bêdem û bêdor ê 7 tepişteyan roja 17. de dewam kena. Tepişteyî Îlhamî Îşçî, Ûgûr Urun, Zennar Demîr û Hîccet Ûmûî 17 rojî yo, Reşît Dayan û Ugur Uyar 12 rojî yo, Umît Ozen 9 rojî yo grevê vêşanîye de yê.

Tepişteyan vera kerdişanê xiraban û îşkenceyî, bi rayîrê avûkatanê xo muracatê Komeleya Heqanê Merdiman (ÎHD) a Dîlokî kerd.

Muracat de ame vatene ke binpaykerdişê heqanê tepişteyan wina yê:

''Zîndan de cigêrayîşo rût yeno ferzkerdene, hûmaritişê payanserî yeno ferzkerdene, wextê pêvînayîşan de rayraşîyayîşê sey leşkeran yeno ferzkerdene.''

Serekê ÎHDyî yê Dîlokî Sînan Taştekînî tepişteyî zîyaret kerdî û pare kerd ke şeker, sole û lîmonê qîmî nêdîyenê tepişteyanê grevê vêşanîye û çalakîye sey 'rojeyê mergî' dewam kena.