Zîndanê Amedî ke wextê Darbeya 12ê Êlula 1980î de bi des hezaran kesî tede tepişîyayî, îşkence dî û zîndananê tewr xiraban ê dinya ra yew o, serranê peyênan de ame vengkerdene. Hemserekê Şubeyê Amedî yê Komeleya 78an Huseyîn Bariş û Hemsereka Odaya Mîmaran a Amedî Selma Aslan derheqê babete de ANFyî rê qisey kerd û îfade kerd ke ganî Zîndanê Amedî bibo muzeya şerme.

Huseyîn Barişî ard ziwan ke o 1980 de ameyo destbendkerdene, di mengan zîndan de pêro metodê îşkenceyî dîyê û rixmo ke dosyaya ci de sebebê tepişîyayîşî çin bibi 10 serrî tepişîyayo.

Barişî da zanayene ke serebûtê ke o çax qewimîyayê nênê vîrakerdene û vat: ''Hem ma hem zî keyeyê ma pêrîşan bîyî.  No zulm 50 hezar merdiman rê ame kerdene. Senî ke kerdişê Nazîyan sey muzeya şerme dinya rê yenê mojnayene ganî Zîndanê Amedî zî bibo muze. Ganî no zîndan nêbo merkezê kulturî ûsn. No zîndan teyna seba kurdan nê seba pêro merdimatîye cayê şerme yo.''

Selma Aslan zî pare kerd ke Zîndanê Amedî seba şarê Amedî hiş û vîr o û vat: ''Girîng o ke no vîro kolektîf bêro pawitene û neslanê neweyan rê bêro neqlkerdene. 1980 de Zîndanê Amedî ame awankerdene û 12ê Êlule ra dima sey zîndanê leşkerîye şuxilîya. Yanî bi îşkencexane û bi serran merdiman tede dejê giranî dîyî û kişîyayî. Zîndanê Amedî rew ra rojdem de bi. Şewêke nişka ra bi ameyîşê Erdoganî zîndan bi temamî ame vengkerdene û sey mulkê ci teslîmê Wezîrîya Kultur û Turîzmî ame kerdene. Îqtîdar herinda ke nê cayî sey vîrî bipawo çin keno.

Bira serê Zîndanê Amedî teyna binê înîsîyatîfê nê îqtîdarî û dezgehan de nîya. Bêguman ganî no zîndan bibo muze ke hesabê kerdişan tede bêrê persayene. Ganî no zîndan bibo cayêkê yadkerdişî.''