Zînî Wertê mabênê Gelîya Şawrê û bajarekê Ranya de ya. Rayîrê bajarekanê Ranya û Çomanî zî na herême ra derbaz beno ke mabênê koyanê Qendîl û Karoxî de sey pirdêk a. Hêzê ke nê herême de ca gênê eşkenê bi hawayêkê asanî gelîyanê Şawrê û Zergele yê Qendîlî kontrol bikerê.

Herême heta serra 1975î serewedaritişê Başûrê Kurdîstanî destê pêşmergeyanê YNKyî de bîye. Serra 1991î KDP û YNK na herême de pêkewtişê bişîdetî kerdî. Peymana şerî ra dima zî herême kewte binê kontrolê YNKyî. 

Herêma Zînî Wertê heta menga adare herêma tewr biasayîşe ya Başûrî bîye. Menga adare ra dima Tugayê 7. yê PDKyî pê îdîaya janê vîrusê Korona herême de ca da xo. Wextêkî ra dima eşkera bi ke armanco sereke îşxal û hêrişêkê vera Qendîlî yo.

Herêma Zînî Werê serra 2000î de kewte destê Gerîlayanê Azadîye yê Kurdîstanî. PKKyî dima na herême şar, YNK û PDKyî rê kerde a. Heta destûr da ke koma qije ya pêşmergeyanê YNKyî herême de ca biba.

La PDK rixmê waştişanê pêro terefanê sîyasîyan xîret keno ke hêzanê xo bierşawo herême. PDKyî hêzê taybetî yê bi nameyê Zêrevanî zî erşawitî herême. Alozîya herême zî bi nê hawayî bena pîlêr. Goreyê îdîayan mîyanê nê hêzan de hêzê 'Pêşmergeyên Roj' zî estê.

Goreyê vatişanê dewijanê Doka Şawrê û Wertê mîyanê pêşmergeyanê PDKyî de kesê estê ke tirkî qisey kenê, cîhazê çimdarîye û ajanîye kirişenê. Dewijî îfade kenê ke nê kesî personelê MÎTî yê. Teyarayanê keşf û şerî yê dewleta tirke zî herême de bi hawayêkê bêmabênî têgêrayîşê xo dewam kenê.

Hêzê sîyasî û şarê Başûrê Kurdîstanî wazenê ke PDK hêzanê xo herême ra tepîya bianco. Eke PDK bi nê hawayî dewam bikero mabênê kurdan de şerêk do biqewimo û berpirsîyarê nê şerî zî KDP yo.