Fermandara Qerargehê Merkezî ya YJA-Starî Zozane Çewlîg Medya Haber TV de Bernameyê Taybetî de rojdem ercna.

Qiseykerdişê Zozane Çewlîg ra tayê noqtayê girîngî wina yê:

''Seke zanîyeno 25ê teşrîna verêne serrgêra şehadetê Fermandare Bêrîtane yo û serrgêra ronîyayîşê artêşa cinîyan o. Ez şexsê Fermandare Bêrîtane de pêro şehîdanê ma bi rêzî yad kena. 

Komployê Mîyanneteweyîyî 26 serrî xo pey de verdayî. Rayber Apo binê tecrîdêkê giranî de yo. Şexsê Rayber Apoyî şarê ma û sîyasetê kurdan yenê tecrîdkerdene. Nê rojan de nişka ra îqtîdarê AKP-MHPyî tayê qiseyî eştî werte. Xora Rojhelatê Mîyanênî de şerê giranî û kaosê xorinî est ê. Nê kaosan ra oyo tewr pîl zî meseleya kurdan a. îqtîdarê AKP-MHPyî bi serran o çaresernêkerdişê na mesele de israr keno.

Dewleta tirke bi destekê PDKyî hêrişê gerîlayan kena la ancî zî nêeşkena netîceyêke bivisna destî. Tirkîya binê îqtîdarê AKP-MHPyî teng bena. Eke AKP-MHP meseleya kurdan çareser nêkero do birijîyo. Têgêrayîşê ma tim waşt ke na mesele çareser biba. Têkoşînê ma bi taybetî 2024 de zaf zor da nê îqtîdarî. Nika Erdogan û Bahçelî bi hawayêkê taktîkwarîyî nêzdîyê na mesele benê. 

2024 de gerîlayan vera hêrişanê dewleta tirke yê bi destekê PDKyî qetî tawîz nêda. Na serre de qet yew mewzîya ma de apeyşîyayîş çin o. Raşt o dewleta tirke îşxalê xo hîra kerdo la ser nêkewto. Dewleta tirke seba ke Behdînan, Biradost, Xakurkê û Herêmanê Pawitişî yê Medya de nêeşkena erdî ra şora hewayî ra nê cayan dana bombayan ver. Gerîlayanê ma 2024 de çalakîyê serkewteyî kerdî. Dewleta tirke nê binkewtişan ra panîk bîya. Kurdîstan de raştîya gerîlayan bi hawayêkê xurtêrî estbîyayîşê xo mojnena ra. 

Şehîde Bêrîtane seba cinîyan ê kurdan û şarê kurdî xetêk a. Embaze Bêrîtane hema 1992 de bi çalakîya xo vera xeta xayînîye tewiro tewr raşt dîyar kerd. Bêrîtane ma rê nîsbeta rêxistinî û îdeolojîk a. Ma sey YJA-Starî ewro xeta Bêrîtane de ciwîyenê û şer kenê. Ma hêzê xo yê tewr pîlî zî raştîya Bêrîtane ra gênê. Bêrîtane yena manaya welatperwerîye û welatî. Ganî pêro cinîyî xeta Bêrîtane de xo rêxistin bikerê û wayîra xeta aye vejîyê. Ma sey gerîlayanê YJA-Starî mîrasê Bêrîtane do tim bipawê.

Xeyrê keda Rayber Apoyî, Sarayan û Bêrîtanan de ewro artêşa ma ya cinîyan est a. Cinîyan 32 serrî verî xo bi hawayêkê xoserî rêxistin kerd û artêşa xo naye ro. Rayberîye bi ronayîşê artêşa cinîyan bi hawayêkê şorişwarîyî vurîyayîşê cidîyî kerdî. Artêşa cinîyan hem hêzê xopawitişî yê hem zî hêzê îdeolojîkî yê. Ewro YJA-Star wayîrê hêz û îdeolojîyêka pîle yo. Her ke şino gerîlayê YJA-Starî xo aver benê û serkêşîya şerî kenê.

Dayîke Emîne Şenyaşar bi sereyê xo xoverdayîşêko pîl kerd û ser kewte. Ez aye bi heskerdiş û rêzkerdişî selam kena. Tewirê aye tewirê xopawitişî bi. Ma zî ganî nê tewirî xo rê nimûne bikerê. Ez wina bawer kena ke nê prosesî de pêro cinîyê kurdî û şarê kurdî xo rêxistin bikerê û xeta Rayberîye de sey xetêka alternatîfe ser bikewê. Ez her kesî rê serkewtiş wazena.''