Zulmê dewlete vîrusê Korona nas nêkeno, îşkenceyê ci bêmabên dewam keno. Vîrusê Korona ra her kes kewt peyê cuya xo. Labelê eşkera bi ke Îbrahîm Halîl Bozkurt û xalzayê ci Alî Fîdansoy Riha de 9 rojan Buroyê Têkoşînê vera Terorî (TEM) de ameyî îşkencekerdene. Birayê Bozkurtî Serdal Bozkurtî zanayîş da ANF û pare kerd ke kekê ey û xalzayê ci bîyî hedefê komploya polîsan.

Bozkurtî da zanayene ke kekê ey o ke mezgê xo ra nêweş o û xalzayê ey 18ê adara 2020î de ameyî destbendkerdene û wina qala serebûtî kerde: ''Şewa 18ê adara polîsan eşt keyeyê kekê mi Îbrahîm ser. Wexto ke mi no eşnawit ez şîya uca. Polîsan dokumentê cigêrayîşî mojna û Îbrahîm persa. Keye de gerîyayî û şîyî. Ma serê sibayî pê hesîyayî ke kekê mi û xalzayê mi ameyê destbendkerdene. Rojêke ra dima zî mi avûkatêk/e erşawit/e TEM. Pêvînayîşî ra dima avûkatî/e vat ke Îbrahîm û xalzayê mi asayîş de îşkence bi nînan ame kerdene û bi îşkence îfadeyê înan ame girewtene. Xalzayê mi Alîyî avûkatî/e rê vat ke polîsan înan rê gef wend  ke ceyran bidê nînan, o zî neçare mend ke îfade îmza bikero. Kekê mi û xalzayê mi wexto ke mabênê Riha û Pirsûsî de bi wesayîtî şîyêne destpêk de hetê wesayîtê sivîlî ra ameyêne teqîbkerdene dima zî polîsan wesayît vindarna. Polîsan îdîa kerd ke înan bagaj de çantayêka gumandare dîye û îdîa kerd ke na çante aîdê Îbrahîm û Alî ya. Semedo ke dosya ser o bira nimite esta ez nêeşkîya zêdêr zanayîş bigêra.''