Zulmê dewlete ra koç kerd, zîndanê PDKyî de merd

Roniştoxê Kampa Multecîyan a Şehîd Rûstem Cûdîyî (Mexmûr) Metîn Dawûdo ke hetê Asayîşê Hewlêrî ra amebi tepiştene, vizêr zîndanêkê PDKyî de dinyaya xo bedilnaye.

17ê temmuza 2019î de hukmatê Başûrê Kurdîstanî vera Kampa Multecîyan a Şehîd Rûstem Cûdîyî (Mexmûr) ambargo kerd. A roje ra nata ambargo dewam keno. Roniştoxê Mexmûrî seba ke debarê xo bikerê wexto ke şîyêne Hewlêr hetê PDKyî ra tepişîyayî.

Metîn Dawudo 45 serre zî nînan ra yew bi. Dawudî vizêr zîndanêkê PDKyî de dinyaya xo bedilnaye.

Dawûd Hewlêr de xebitîyayêne. 7ê teşrîna peyêne ya 2020î de Dawûd hetê Asayîşê Hewlêrî ra tepişîya û erzîya zîndan. Keyeyê Dawûdî a roje ra pey tira xeberêke nêgirewte. Tewr peyên avûkatê Dawûdî Hewlêr de aqîbetê ci persa. La mesuldaranê asayîşî tira vat: ''Metîn krîzê qelbî ra merdo.''

Metîn Dawûd serranê 2009-2012î de Serekê BDPyî yê qezaya Ebexî ya Wanî bi. La zulmê dewlete ra Dawûd neçare mend ke koçê Başûrê Kurdîstanî bikero.

Metîn babîyê 5 domanan o û lajêkê ci zî sey gerîla şehîd bibi. Pawîyeno ke cenazaya Metînî Ebex de bêra definkerdene.