Dewijanê Badîyanî yê Tirbêspîyê serrgêra 23. ya Komployê Mîyanneteweyî de qala vîrameyîşê xo yê bi Rayberê Şarê Kurdî Abdullah Ocalanî kerde.

Salih Seyîdî ard ziwan ke o 1991 û 1996 de Ocalan dîyo û wina qala nê pêvînayîşan kerd:

''1991 de ma sey keyeyî şîyî Beyrûd-Lubnan. O çax qasê 80 hezar kesî warê Rayberîye de estbîyî. Her kes uca de kom bibi. Şan Rayber Apo vejîya cayê sey şûmşînî. Ey qasê 3 saetan qisey kerd. Dima ey waşt ke êyê ke eşkenê wa abigêrê. Seba ka ma Qamişloyî ra şîbî ma a şewe uca de mendî. Embaz Leventî serê sibayî vat Rayberîye do reyna bêra. Ma pabeyê ey bîyî. nêmroje o ame. Qisey kerd û vat 'Şima mi ra hîna çêr ê, şima prosesê hîna krîtîkî de tîya de mendî.' Ey şewe û a nêmroje cewab da persanê ma. Osman Sebrî zî uca de bi. Rayberîye ey rê vat 'Ti apê ma yî, ma rêçê to de yê.' Osman Sebrîyî vat 'Nê, ti rayberê ma yî. Çîyo ke to kerdo ma nêeşkenê bikerê. To ciwan û cinîyê Kurdîstanî ardî yewca, metodê şerî na ro. Ti do Kurdîstanî awan bikerî. Ma rêçê to de do şêrê.' Seke Osman Sebrîyî vat Rayberîye seba kurdan bîye çimeyê cuye, estbîyayîşî.

1996 de ma qasê 125 kesan şîyî uca û ma waştişê Rayberîye ser uca de mendî. Ma Rayberîye reyde nan werd. Embazanê ma ra Îsmaîlî Rayberîye rê vat 'Ti çira koma kokiman awan nêkenî?' Rayberîye vat 'Fikrêko baş o, ma do bikerê. Domanê şima koyan de şer kenê. Şima zî mîyanê şarî de bixebitê, şarî rêxistin bikerê. Embazîya xo hol bikerê. Kurdî wayîrê na dewa yê, dostê na dewa nîyê. Xo rêxistin bikerê, kadroyanê xo virazê.' Warê Rayberîye (Akademîya Mahsum Korkmazî) mendêne warê hecî. Wexto ke ma resayî uca seke ma resayî hecî. Coka 15ê sibate ma rê roja reş a. Şingalî ra heta Minbicî çar parçeyanê Kurdîstanî de tecrîd û îşkenceyêko giran esto. Wa dişmen baş bizano ke îradeyê şarî do nêşikîyo. Ma do heta çilka peyêne ya gonîya xo rêçê Rayberîya xo de bibê. Heta ke ma Rayberîye mîyanê xo de bivînê têkoşînê xo rê dewam bikerê.''

Mihemed Emîn Seîdî zî serranê 90an de Rayberê Şarê Kurdî dîbi. Seîdî wina qala pêvînayîşî kerde: ''Wexto ke ma şîyî warê Rayberîye, Rayber Apoyî ma rê qala welatperwerîye, rêxistinîye û prosesê ê çaxî kerd. Wexto ke qiseyê ey qedîyayî ma soz da ci ke heta çilka peyêne ya gonîya do bixebitê û rêçê ey de bibê. Ma hema zî sozê xo anê ca. Rayberîye pê qiseyan terîf nêbena. Ma ey ra û erjanê ey ra hes kerd. Cuya bê rayberîye mumkîn nîya. Mi berê xo 1989 de na rêxistine rê akerd. Mi bi hezaran gerîlayî dîyî. Ewro şoriş bi felsefeya Rayber Apoyî yeno kerdene. Ganî dinya bizana ke PKKyo ke Rayberîye awan kerdo, do qetî nêşikîyo, do ser bikewo.''