Platformê Xoza û Dormeyî yê Xozat-Pêrtag Sekasurî vera projeyê madene pomza yo ke yeno waştene ke qezaya Xozat û Pêrtagî yê Dêrsimî de bêro ronayene, rayraşîyayîşo qirseyî organîze kerd.

Rayraşîyayîşo ke bi slogana “Ma wayîrê waranê xo yê ciwîyayîşî vejîyenê” ame kerdene xeylê partîyê sîyasîyî û rêxistinê dormeyî tewrê ci bîyî. Rayraşîyayîş de sloganê sey “Xoza, awe û herra mi rê destê xo derg mekere” û “Xozat ramekewe wayîrê herra xo veje” ameyî vatene.

Yeno waştene ke no proje warê hîrayî yê sey Bargini,Zeve, Orcan û dewanê Dêrsimî de bêro rayraberdene. 

Mixtarê Barginî Mustafa Ruzgarê ke bi nameye platformî qisey kerd ard ziwan ke têna xoza nê mekanê ke semedê bawerîya elewîyan bimbarek ê nê cayî zî binê tehdîtî de yê û vat mekanê bimbarekî yê sey Sultan Hidir, Ocagê Aguçanî û Dervîş Cemalî binê rîskê çînbîyayîşî de yê.

Ruzgarî ard ziwan ke rûhsatê projeyî 2024î de ame girewtene la dewijan 2025î de eşnawit û vat şîrkete no proses şarî ra nimit.

Ruzgarî vatişê “Ma daran birnenê û dima ra newe ra nanê ro” zî rexne kerd û vat, “Eke warê ma yê ciwîyayîşî, zîyaretê ma û vîrê ma yo tarîxî ameyî çînkerdene  şima hinî çi peyser anê?” 

Avukat Kenan Çetîn zî vist vîrî ke Sekasur zî warê madenî de ca geno ke derceya verêne ra warê SÎTî yo û Terteleyê Dêrsimî yê cayê ci yo muhîm est o û vat  Mehkemeya Îdareyî yê Erzînganî rê dewa ameye akerdene  û demê nizdî de ê do qerarê “vindarnayîşê rayraberdişî” biwazê.

Wekîla Dêrsimî Aytene Kordu zî vat proje têna zirar nêdano xoza, vera kultur û bawerîya şarê Dêrsimî hêrişêk û  semedê têkoşînê huqûqû û rêxistinkerdeyî yê girdi veng da.

Rêxistinanê dormeyî û temsîlkaranê sîyasîyan waşt wa şîrketa madenî projeyi betal bikero.