Adle Bekîr dewa Kanîya Kurdan a Kobanê ra ya. Adle çêranê xoverdayîşê Kobanê ra yew a. Aye wextê xoverdayîşê Kobanê de cepheyê peyênî de ca girewt.

Adle qala ê rojan kena û vana: ''DAÎŞî 3 baskan ra hêriş kerdêne; ji Til Şehr, Kaniya Kurdan û Quble. Ma şerwanan rê nan pawtêne. Embazêkî nişka ra vat ke DAÎŞ ho yeno nêzdîyê ma bîyo. Embazî vat ma tupan biqefilnê. Heta ke ma nan nêpewt ma tupî nêqefilnayî. Dima ma hacetê xo kom kerdî û şîyî. Dima DAÎŞ kewt Kobanê. Ma seba werdpewtişî Kobanê de mend, tay kesan zî koç kerd. Qala 'Kobanê do bin bikewo' ya Erdoganî ra dima kokim û ciwanan pîya çekî girewtî xo destan û xo ver da. Şewêk mi hewnêk dî. Rayberîye mi rê vatene o do berî ma rê abikero. Wexto ke ez şîya bîya embazan mi rê vat ke Rayberîye ferman dayo ke wa Kobanê nêkewo. Ma her roje kincî şitêne, nan viraştêne, şehîdî defin kerdêne, birîndarî derman kerdêne û ma kincî resnayêne cepheyê şerî. La nêno vîrê mi ke ma rojêke vato 'ma qefilîyayî.'  Ceyran, awe, nan çinbî.

Xeylêk merdimî Kobanê de şehîd bîyî. Her parçeyê Kurdîstanî wayîrê Kobanê vejîya. Ez do fedakarîya şarê Vakurî zî do qet vîra nêkera. Ma deyndarê înan ê. Axir dişmen pê ma nêeşka. Serkewtiş bi ê ma. Roja ke ma Kanîya Kurdan de alaya DAÎŞî arde war a roje seba ma roşan bîye. Vatişê 'Kobanê do bin bikewo' yê Erdoganî ma kerd xurtêr. Vatişêkê kurdan esto vano 'kurdî serwişk ê, înad ê.' A roje no çi eşkera bi. Ma payan ser o mendî, ê remayî...''