Çewlîg de perey ciwano bi nameyê Emir Can yo ke madeyê kungkerdişî şuxilnayêne û rixmo ke keyeyê ci xebere daye mudirîya polîsan û muracatanê cayanê eleqedaran kerd ke wa bigêro binê kontrolî ke ne zirar bido xo ne zî zirar bido kesanê bînan la çew pê eleqedar nêbi,  bi kardî panc kesî qetil kerdî.

Dezgehê pabesteyê Platformê Dezgehanê Demokratîkan (DEKUP) û hemşaredaran ra heteyêkî Çewlîg de tehzîyeyê ke cayanê cîya cîyayan de ameyî ronayene zîyaret kerdî û merdimanê ci rê serweşîye waşte. Heyetî nêweşxane de birîndarî zî zîyaret kerdî û înan ra şîfa waşte.

Badê zîyaretan heyetî verê banê DEM Partî ya Çewlîgî de eşkerayîye daye. Eşkerayîye de verê wekîlê bajarî Omer Faruk Hulakuyî qisey kerd.  Hulakuyî ard ziwan ke o semedê nê qewimîyayîşî hem zaf qehrîyaye yo hem zî zaf hêrsbîyaye yo û vat: ''AKP û MHPyî bi polîtîkayanê şerî taybetî Tirkîya û Kurdîstan kerdê warê madeyê kungkerdişî. Xora fotofrafê  Wezîrê Kranê Zereyî yê verênî bi kesanê ke madeyê kungkerdişî şuxilnenê û roşkenê est o. Kesêkî 15-16 kesî birîndar kerdî polîsan mudaxaleyê ci nêkerd la nika semedê eşkerayîya ma bi seyan polîsî ameyî têhet. Walî û mudirê polîsan ê nê bajarî tim îdîa kenê înan tîya tedbîrê asayîşî girewtî la ma dî ke asayîş çîn o. Tîya facîyayêke qewimîyaye ganî seba ke çîyo winayên reyna mebo ma têkoşîn bikerê.''

Wekîlê DEM Partî yê Bêdlîsî Huseyîn Olan zî vist vîrî ke rixmo ke keyeyê hêrişkarî xeylêk reyî muracat kerd walîyê bajarî tedbîr nêgirewt û vat: ''Berpirsîyarê qirkerdişî walî û mudirê polîsan o. Çunke nê qirkerdişî eşkera vato ke ez ha yena. Çîyo winayên mumkun nîyo ke bêro qebulkerdene. Ma zanê ke cografyaya Kurdîstanî de madeyê kungkerdiş çiwext dest pêkerd û senî vila bi, tucaranê madeyê kungkerdişî senî bi teyarayan kirişt. Coka no bi zanayîş ame kerdene. Plankerde ciwananê ma ancanê mîyanê na hezoke. Ma do na babete teqîp bikerê. Ma peyê ê kesan de yê ke na babete îxmal kerdo. Ewro no kuçe bi polîsan bîyo de, bi seyan kamerayî ma seyr kenê.  Vizêr hela ke şar bi kardî ameyêne birnayene şima ça de bî? Şima nê rê çimê xo girewtî. Berpirsîyar şima yê. Ma do çirey peyê nê cameverdê.''

Endama TJA Emine Çaylak zî kesê ke ameyî qetilkerdene merdimanê înan ra serweşîye waşte.

Qiseykerdişanê bînan de zî bale ameye antene polîtîkayanê şerê taybetî ser û ame waştene ke wa vera nê têkoşîn bêro xurtkerdene.