Îdareya Xoserî ya Rojawanî îfade kerd ke Sûrîye û Rûsya derheqê berê Sînorî yê Til Koçerî de înan sûcdar kenû no tewir xizmetê şaranê Sûrîye nêkeno. Îdareyê Xoserî ard ziwan ke seba ke hetkarîye merdimîye biresa akerdişê beranê sînorî girîng o.
Rûsya û Sûrîye 13ê gulane de eşkerayîyêka hempare kerdbi û îdîa kerdbi ke berê sînorî yê Til Koçerî seba remnayîşê çekan, sewqîyatê hêzan ê çekdaran û welatanê bînan rê erşawitişê nêweşanê Korona yeno xebitnayene.
Îdareyê Xoserî yê Rojawanî zî eşkerayîyêke daye û nê îdîayî red kerdî. Eşkerayîya Îdareyê Xoserî de ame vatene ke nê îdîayî 'sîyasî' yê. Eşkerayîya Îdareyê Xoserî wina ya:
''Nê vatişê Rûsya û Sûrîye nênê qebulkerdene. Ê pê na îdîayan wazenê ke dormeyê Rojawanî bigêrê û vera îdareyî teda bikerê. No tewir şaranê Sûrîye rê xizmet nêkeno. Rûsya seba girewtişê berê sînorî yê Til Koçerî raya redî daye. Herême de bi milyonan merdimî û kampanê sey Roj û Hol de zî bi hezaran merdimî ciwîyenê. Berê sînorî seba peydakerdişê hewcedarîyanê nê merdiman girîng o.
Rêxistina Weşîye ya Dinya û hukmatê Sûrîye herême de berpirsîyarîyanê xo nêanê ca. Hetê bînî ra hukmatê Sûrîye Şamî ra perayîşê ver bi herême nêvindarnayî û asteng keno ke nê raywanan rê testê vîrusê Korona bêro kerdene.
No berê sînorî seba resayîşê hetkarîyanê merdimîye û têkoşînê vera DAÎŞî zaf girîng o. Eke bêrê sînorî abibo nê hetkarîyî do biresê herême. Eke bêrê sînorî nêro akerdene krîzêk do biqewimîyo û nêwelatê ke akerdişê berê sînorî asteng kenê do bibê berpirsîyarê nê krîzî.
Ma venga şaranê Sûrîye danê ke babetê merdimîye ganî seba menfaatanê serdestbîyayîşî nêrê xebitnayene. Vera vîrusê Korona ganî her kes berpirsîyarîya xo bîyaro ca.''
