Hemsereka Meclîsê Til El Şayîrî yê Hesekê Seka El Feysel El Hermes û Hetkara ci Hinde Letîf El Xidêr roja îneyî hetê kesanê nenasan ra ameybî remnayene û kiştene. Heyetê Cinîyan ê Îdareyê Xoserî yê Rojawanî qirkerdişê Hemsereka Tel Şayîrî û Hetkara ci bi eşkerayîyêke şermezar kerd.

Eşkerayîye de ame parekerdene ke cinîyan her tim Şorişê Rojawanî rolêko pîl girewt xo milî û no hêriş vera azadîya cinîyan ame kerdene.

Eşkerayîye de wina ame vatene: ''Aseno ke cergê terorîstî pê hêrişanê winasênan wazenê îrade û hêzê cinîyan çin bikerê. Ma nê qirkerdişî şermezar kenê, keyeyanê şehîdan rê serweşîye wazenê. Ma venga cinîyanê dinya, rêxistinanê heq û merdimîye danê ke vera nê kerdişan tewirê xo bimojnê.''