Artêşa tirke ya îşxalkere Efrînî ra dima hîrê serrî verî Girê Sipî û Serêkanîyê zî îşxal kerdbî. Roniştoxê nê şaristanan zî hetê Îdareyê Xoserî ra kampanê ci de ameyî cakerdene. . Barê nê kampan têna milê Îdareyê Xoserî de yo.

Îdareyê Xoserî 2020 de seba roniştoxanê Serêkanîyê Kampa Serêkanîyê û Waşokanî naye ro. Seba roniştoxanê Girê Sipî  zî Reqa de kampêke ronîyaye. Îdareyê Xoserî mesrafê nê kampan bi xo da û tay dezgehanê hetkarîye zî destek da Îdareyê Xoser. La tay dezgehanê hetkarîye zî Rojawanî rê destek nêda.

Kampa Waşokanî 2019 de rojawanê Heseke de ronîyaye. Tede hezarêk û 987 xeymî est û nê xeyman de se ra 50ê ci domanî 2 hezar û 355 keyeyî manenê. Nufusê kampe 16 hezar û 306 o.

Kampa Serêkanîyê zî tebaxa 2020î de ronîyaye. Nika kampe de 2 hezar û 793 xeymî est ê, tede 2 hezar û 395 keyeyî manenê û nufusê kampe 13 hezar û 729 o. Xeyman ra 154ê ci zî sey mitbaxî şuxilîyenê.

Mesrafê nê wird kampan zî milê Îdareyê Xoserî de yê. Dezgehê sey Ekted, NRC, IRC, AŞNA, Heyva Sor a Kurd, KRC, UPP, Selam Merkezi, SP, Plomond, Merkezê Jîyane û Merkezê Nûjine zî hetkarîya kampe kenê ka na hetkarîye roniştoxanê kampe rê nêvejîyena.

Wird kampan de zî ocaxê weşîye est ê. Nê zî îmkananê kêman ra têna rewşa lezabeze de mudaxele kenê. Nêweşî exlebî sewqê nêweşxaneyan yenê kerdene. Kampî hewceyê malzeme, dermanxane, laboratuwar û elemananê weşîye yê. Seba janî kampe de cayêk ameyo peydakerdene la dezgehê hetkarîye seba ney zî destek nêdanê.

Wird kampan de bi temamî 4 hezar û 780 xeymî est ê. Seba ke xeymî nêvejîyenê tay keyeyî pîya manenê. Dezgehanê mîyanneteweyîyan heta nika hetkarîya xeyme zî nêkerde.

Rixmê îmkananê kêman zî Îdareyo Xoser seba perwerdeyê domanan xîret keno. Nika wendekaran rê dibistanê qijî virazîyayî û nê dibistanan de 6 hezar wendekarî est ê. Tay domanî zî nêeşkenê şorê dibistane. Wendekarî zî hewceyê malzemeyanê perwerdeyî yê.

Seba ke zemînê kampan rind nîyê xeymî xirab ronîyenê. Kampan de meseleyanê ceyran, roşnîkerdiş û binawanîye ra roniştoxî zehmetî ancenê.

Îdareyo Xoser îmkanê karî dano roniştoxanê bêkaran û keno ke bêkarîye biqeda. 

Goreyê tesbîtanê Komîteya Koçkerdişî ya Rojawanî bîlançoya hîrê serran a îşxalê Girê Sipî û Serêkanîyê wina ya:

-Îşxalî ra heta nika Girê Sipî û Serêkanîyê de 68ê ci cinî û 42yê ci domanî 511 kesî ameyî tepiştene, 185 kesî ameyî remnayene, 325 kesan rê îşkence ame kerdene û tewr tay 5 kesî binê îşkenceyî de kişîyayî, 92 kesî ameyî remnayene bi Tirkîya, 48 kesan rê Tirkîya de cezaya muebede dîyaye, 11 cinîyî zî tede 56 kesî ameyî qetilkerdene û 11 kesî zî ameyî dardekerdene.

-Se ra 85 roniştoxê Serêkanîyê hema zî nêagêrayî keyeyanê xo. 2 hezar û 500 keyeyê xerîbî Serêkanîyê de ameyî cakerdene. 55 keyeyê DAÎŞî yê Iraqî Serêkanîyê de ameyî cakerdene. Îşxalkeran dest na tewr tay 5 hezar û 500 banan ser, hezar û 200 dikanan ser. 55 dewî ameyî vengkerdene, dest nîya tewr tay mîlyonêk donim erazî ser.

-Herême de asayîş çin o, tewr tay 72 teqayîşî qewimîyayî û nînan de 145 sivîlî ameyî kiştene, tewr tay 300 kesî birîndar bîyî.