Îdareyê Xoserî yê Rojawanî derheqê Berê Sînorî yê Til Koçerî de eşkerayîyêke daye. Eşkerayîye de ame vatene ke ber binê ablûqa de yo û wextêkê dergî ra nata girewte yo. Îdareyê Xoserî îfade kerd ke na ablûqa vera nînan sey çeke şuxilîyena.

Îdareyê Xoserî vat: ''Hêrişanê DAÎŞ û Tirkîya ra dima bara Îdareyê Xoserî pê koçanê neweyan xeylêk bîye girane. 5 mîlyon merdimî herêmanê Îdareyê Xoserî de binê şertanê xiraban de yê. Neteweyê Yewbîyayeyî û rêxistinê mîyanneteweyî zî na rewşe ra mesuldar ê la mesuldarîya xo nêanê ca. Berê Sînorî yê Til Koçerî (El Yerûbî) seba herême rayîrêko girîng o. Bira qefilnayîşê berî 8ê hezîrana 2020î de ameye girewtene. No tewir paştî dano ablûqaya vera şaranê herême.

Sey Îdareyê Xoserî ma venga komelê mîyanneteweyî û Neteweyanê Yewbîyayeyan danê ke rewşa merdimîye û menfaatanê sîyasîyan yewbînan ra cîya bikerê û na ablûqa wedarnê. Akerdişê Berê Til Koçerî şarê ma rê mesuldarîya warê mîyanneteweyî yo.''