Îdareyê Xoserî yê Rojawanî bi wesîleya serrgêra diyîne ya ronayîşê xo Reqa de kombîyayîşê çapemenîye kerd. Kombîyayîş de ame parekerdene ke herêmê ke binê îşxalê dewleta tirke de yê, do bêrê azadkerdene.
Hemserekanê Meclîsê Rayberdişî Bêrîvane Xalid û Ebîd Hamîd El Mînbaşîyî Merkezê Meclîsê Rayberdişî yê Îdareyê Xoserî yê Reqa de kombîyayîşê çapemenîye serûber kerd. Hemserekê Meclîsê Pêroyî Ferîd Etê û Sîham Qeryo û Hemserekê Meclîsê Edaletî yê Îdareyê Xoserî Îmad Keraf kombîyayîş de amade bîyî.
Eşkerayîye hetê Sîham Qeryoyî ra ameye wendene. Eşkerayîye de serrgêra ronayîşî ameye fîrazkerdene û ame parekerdene ke nê di serran ra nata herêmê Reqa, Dêrazor, Tebqa û Minbic ameyî xelisnayene.Eşkerayîye de ameyî vîrvistene ke Îdareyê Xoserî vera xebatanê terorî zî heta nika xîretêko pîl mojna û rixmê zulm û tedaya dewleta tirke û cerganê ci tim hewcedarîyê şarî peyda kerdî.
Îdareyê Xoserî bale ante ser ke têkoşînê înan ê vera vîrusê Korona zî bi heman hewayî dewam keno.
Eşkerayîye de ame parekerdene ke Îdareyê Xoserî heta nika destkewteyê tarîxîyî vistî destî û venga şarê Rojawanî da ke wa paştî bido QSD, Hêzanê Asayîşê Zereyî û Îdareyê Xoserî.
Eşkerayîya Îdareyê Xoserî wina dewam kena: ''Ma soz danê şar û şehîdanê xo ke temsîlkarîya şima bikerê. Ma do xo ver bidê û Efrîn, Serêkanî, Girê Sipî û pêro herêmanê ke binê îşxalî de yê bixelisnê û garantî bikerê ke şarê ma do abigêrê wareyanê xo.''
