Fermandarê Meclîsê Leşkerî yê Serêkanîyê Îmad Menoyî vat îşxalkar wazeno şaristan bigêrê mîyanê çemberî, zaf vîndîbîyayeyê artêşa Tirkî û çeteyanê ci estê. Menoyî vat verba hêrişan xoverdayîşêko bêhempa yeno kerdene.
Fermandarê Meclîsê Leşkerî yê Serêkanîyê Îmad Meno yo ke cepheyê şerî de bi bêtêlê ma xo resna ajansî ma rê wina qisey kerd:
"Hêrişê dişmenî çend giran zî bibê, no şar qet do sereyê xo verê îşxalkaran û mêtingerîye nêno war, seba rûmetê xo heta peynîye şer biko. Hêrişî zaf giran ê la hêzê ma, şervanê ma, şarê ma verba înan xoverdayîşêko pîl dano. Xoverdayîşêko bêhempa yeno kerdene."
Menoyî vat artêşa Tirkî ya îşxalkare û çeteyê aye wazenê dormeyê Serêkanîyê bigêrê û wina dewam kerd: "Wazenê dormeyê şaristanî bigêrê. La ma verba nê hêzan şer kenê , xo ver danê. Heta nika keyeyêk zî nêkewto destê înan. Rojakewtene ra û rojawanî ra wazenê xetêke bivirazê û dormeyê şaristanî bigêrê. No ca wareyê şerî yo, şer nê cayan de esto.Hêzanê ma zî şewe ra çalakîyê bitesîrî kerdî. Hem xeta Til Xelefî de û hem zî xeta Mezrî de çalakîyê bitesîrî ameyî kerdene. Bi desan îşxalkarî ameyî kiştene. Bi panzeran merdeyanê xo kirişênê. Hêzê ma xo ver danê, şewa bîne ra nata ma operasyonêk kenê û nika şer giran o. Ma sozêk dabi şarê xo, ma zî heta çilka peyêne ya gonîya xo seba rûmetê xo şer bikê."
