ANFyî xo resna îtîrafanê hucreyê hemparî yê MÎT-DAÎŞî yo ke wextanê cîyayan de hetê Hêzanê Asayîşê Zereyî ra ame bêtesîrkerdene. Fermanê ke merkezê MÎT-DAÎŞî ra ameyêne dayene hetê kesê bi nameyê Ebû Omer û Emel Muhammed Alî Îsa ra ameyêne erşawitene. Hucreyanê nimiteyan bi rayîrê numareyanê Tirkîya têkilîye ronayêne û bi rayîrê şîrketanê tirkan xo fînanse kerdêne. 

Ahmed Abdulhamîd El Merdûd: Ez Sûrîye de dadîya xo ra bîya. Mi endamê MÎTî Abdûllah Ahmed El Cûma Bûkêmale de şinasna, ey waşt ke ez OSO de bixebita. Ez mîyanê hucreyêkê MÎTî û OSOyî de xebitîyayêne.

Abdûllah Ahmed El Cûma: Ez Bûkemale ra ya. Muhammed El Cumayî waşt ez mîyanê Cindul Firatî de bixebitîya û dîmenê noqtayanê leşkerî û wesayîtanê înan bigêra, şerwananê leşkerî û fermandaran bikişa. Nê emrî hetê Muhammed El Cemî (Mûhammed El Rîxatî) ra dîyayî ke ê Tirkîya de mendêne.

Hasan Alî Mûhammed: Ez Eyn Îsa ra ya. Endamê MÎTî Emel ameye ma mi hetî, ma pîya mayînî berdêne hucreyanê Reqa. Mi Emele zî bi nimitî berdêne Reqa. 

Nadîr Mûhammed Sarûh Halîl: Emele mi ra waşt ke ez tewrê komanê dewleta tirke biba. Mi emranê Emele ser o 100 dolaro sexte bazar de vila kerd, mayînî teqnayî, merdimî kiştî, îstasyonê petrolî teqna, mayîn û çekî erşawitî endamê MÎTî Salîhî. Bedelê nê xebatan de pere û telefon serê Tirkîya ra erşawîyayî mi.

Serhan Îsa Avnî: Cinîya mi Emele Muhammed Alî Îsa ez tewra karanê MÎT-DAÎŞî kerd.Ma Ebu Omerî ra fermanî girewtêne. Mi çek û cebilxaneyî berdêne. Bedelê ney de 300 dolar dîya mi. Cinîya mi Emele tim şîyêne herêmanê ke destê Tirkîya de yê. Merkezê Girê Sipî-Serêkanîyê pîya îdare kerdêne.

Ala Îbrahîm Hasanî: Ez Reqa ra ya. Wezîfeyê mi sewqîyatê mayîn û cebilxaneyan bi. Xalê mi Serhan Îsayî ez tewrê hucreyî kerd. Serhan Îsa endamê îstîxbaratê tirkî bi. Verî mi 3 mayînî berdî cayêkî. Ebû Omer bi rayîrê numareyê Tirkîya gêrayêne mi û ferman dayêne mi. Mi fotografê mayînan şawitêne Ebu Omerî.