Şarê Efrînî yo ke Şehba de koçber o, vera hêrişanê kîmyewîyan ê dewleta tirke ya îşxalkere serkêşîya Têgêrayîşê Ciwananê Şorişgêran de çalakîyêka rayraşîyayîşî kerde. Çalakîye de alayê Rayberê Şarê Kurdî Abdullah Ocalanî, PKK, HPGyî ameyî akerdene, vera çekanê kîmyewîyan sloganî ameyî vatene.

Rayraşîyayîşî ra dima Endama Têgêrayîşê Ciwananê Şorişgêran Zelale Ebdo û Endamê Meclîsê Efrînî Mihemed Ebdo qisey kerd. Înan hêrişê kîmyewîyî yê dewleta tirke şermezar kerdî û venga pêro şarê kurdî da ke vera nê hêrişan çalakîyan bikero.

Çalakîye bi sloganê 'Şehîdî nêmirenî' qedîyaye.