Botan Avaşîn 1996 de Amed de dadîya xo ra beno û birayo qijêr ê 6 wayan û 5 birayan o. Keyeyê Botanî serranê 80an de koçê Mersînî keno. Botan zî şertanê ekonomîkan ra hema sinifa yewine de dest pê xebate keno.

Wexto ke waya ey a 15 serre camêrdê 30 serrî de pê zorê keyeyî zewijîyena Botan pê ci zaf qehirîyeno û bi nê hawayî o sîstem û hişmendîya ê sîstemî hîna nêzdî ra şinasneno. Botan wina qala a rewşe keno: ''Waya mi pê zorî dîyabî zewijnayene, dadîya mi verê babîyê mi de bêçare bîye. Rewşa înan mi rê zaf tesîr kerdêne. Mi vatêne ez senî eşkena hetkarîya înan bikera. Ez raştîya cuye de têrî bîya û mi waştêne hîna zaf çîyan bikera.''

Botan ciwanîya xo de Ciwananê Welatperweran ê Şorişgêran şinasneno. Botan hînî serê sibayî wendekar, nêmrojan lokanta de kedkar û şanan zî şorişgêr bi. Botanî vat: ''Sey ciwanêkê kurdî mi fam kerd ke bê têkoşîn nêbeno. Mi waşt ez verê xo bida koyan la çewî no qebul nêkerd. Ez şaristanan de tewrê xebatanê ciwanan bîya. Heta serra 2014î.

Kobanê

Şerê Kobanê ra dima Botan bi qerardarî 2014 de tewrê têgêrayîşê azadîye beno û mîyanê YPGyî de ca gêno. Botan verî Rojawan de perwerde gêno û mengêke û nêm ra dima cepheyê şerî de çimanê xo akeno. Botan cepheyanê Til Temir, Hemleya Şehîd Rûbarî, Girê Sipî, Sîlûk, Hol, Tişrîn û Minbicî de ca gêno. Botan vano: ''Mi qesasê domananê sey Ugur, Berkîn û Ceylane girewtêne, ney zerrîya mi rehet kerdêne la embazê min ê cepheyî şehîd bîyêne. Ney zî hêrsê mi zêdînayêne.''

Tebaxa 2016î de dima ke rejîmê Sûrîye hêrişê Hesekê kerd Botano ke perwerdeyê çekanê giranan girewtbi embazanê xo reyde sey Tabûrê Şehîd Dilşêr Wanî derbazê Hesekê beno.

Botan vano: ''Roja verêne pêkewtişê şîdetînî qewimîyayî. Hêzê Xopawitişî û Hêzê Asayîşê Zereyî seferber bibî. Hema deqayanê verênan de derbê pîlî ma dabî rejîmî ro. Ma sey grûba tankî kerdêne ke dekewtişê şaristanî bigêrê binê kontrolî. Ma tay cayî xelisnayî. Roja 2. de avantaj hînî ma de bi. Ma plan kerd ke do bişîyêne Wîlayetê Sorî, taxa Xiwêranî pakî bikerê û dima debikewê Panaroma. Saete 24.00 de plan dest pêkerd. Wexto ke embazî pê panzarî şîyêne zîncîrê panzerî qerifîya û ê werteyê rayîrî de mîyanê pêkewtişan de mendî. 6 embazê ma uca de birîndar bîyî. Ma hetê Tiwêna de bîyî. Ma şewe 03.00 de kerd ke a grûbe bixelisnê la ma nêeşkayî. Dima ma pê tankî şîyî hetê înan. Mabênê ma de 5 metreyan estbi la ma nêeşkayêne nêzdîyê embazanê birîndaran bibê. Ma waştêne panzer bivejê, ez panzerî ra vejîyaya û şîya hetê embazêkî. Wexto ke mi û embazî ma nîqaşî kerdêne ke se bikerê seke verê çimanê mi ra tarîtîyêke derbaz bîye.''

Wexto ke Botanî venga Egîdî dîyêne roketêk erzîyeno. Botan xo mîyanê adirî de vîneno, mezgê ci şino û mîyanê tarîtîye de xeniqîyeno. Botan 20ê tebaxe de saete 04.00 de mîyanê gonîye de bi. Ey fam kerdbi ke birîndar bîyo. Dima ke roketo diyîn zî erzîyeno yew dej dekeweno baska çepe ya Botanî û venga Egîdî dano. Egîd zî sere û paştîya xo ra birîndar bibi. Botan 5 deqayan erd de maneno û embazêkê ci ey dekeno mîyanê kepçeyî. Botan bi giranî birîndar bîyo. Egîd îşlîgê xo dirneno û sîneyê Botanî pêşeno. Embazî 10 deqayan de resenê cayê pêkewtişî, Botan û embazanê ci xelisnenê.

Botan mengêke û nêm ra dima hesîyeno xo. Botan vano: ''Embazan vat ez ha nêweşxane de ya. Ez berda nêweşxaneyêkê Silêmanî. Mi nêzanayêne çimê mi şîyê. Mi vatêne se bîyo baska min a çepe, mi vatêne dejeno. La her kes bêveng bi. Mi nêzanayêne destê mi zî qerifîyayo. 10 rojan ra pê embazan ez berda keyeyêkî. O çax destê min o raşt hol bibi. Wextêk destê min o çep kênîya. Mi destê xo yo raşt berd ke ey bikêna. La destê mi çinbi. Dima embazî ameyî, înan vat çimê mi zî şîyê. Vatêne ganî çimê min o parçebîyaye pê amelîyatî bêro girewtene. Ez fikirîya ke çimê mi çinbo zî ez eşkena pê roşnîya felsefeya Rayber Apoyî biciwîya. Mi zî amelîyet qebul kerd.''

Moralê Rojda

Botan o çax Rojda Dêrik şinasneno. Rojda zî çimê xo şer de vînî kerdbî. Rojda pê tewir, coş û perwerîya xo ya bi cuye moral dana Botanî. Botan vano: ''Embazê ma nêzanayêne senî nêzdîyê koran bibê, na babete de yew perwerdeyê înan çinbi. Mi zî bire daye ke ez xo bi xo perwerde bikera. Tedawîya mi serrêke ra dima qedîyaye û ez agêraya Rojawanî. Mi Komîteya Gazî de ca girewt. Ma tim nîqaş kerdêne vatêne ke gelo ma senî derheqê Şorişê Rojawanî de agahîyan bidê dinya. Mi bire daye ke kitabêk binusa. La çim û destê mi çin bîyî. Waştişê mi estbi la bawerîya mi çin bîye.

Mi 2019 de dest pê xebata kitab nuştişî kerd û xebata mi serrêke û nêm dewam kerd. Mi xîret kerd ke qala têkoşînê gazîyan, vîrameyîşan, xoverdayîşê şehîdan bikera, biba vengê înan. Hetê bînî ra mi xîret kerd ke raştîya şerî veja teber.''

Botan seba ke qala embazanê xo yê gazîyan bikera, nameyê înan tarîx de binusa têkoşînî rê dewam kerd, şuxilîyayîşê komputurî musa û bi qelema xo waşt ke bibo cewabê ercnayîşê ''Şehîdanê ke Ciwîyenê'' yê Rayberê Şarê Kurdî Abdullah Ocalanî.

Botanî nêwaşt nameyê kitabî bido la da zanayene ke wextêkî ra pey kitan do bêro çapkerdene.