Muxabîra ANHA Dîcle Ehmeda ke şerê Kobanê teqîb kerd û şahîda xoverdayîşî bîye, bi wesîleya serrgêra 7. qala azadkerdişê Kobanê ANFyî rê kerde.

Dîcle Ehmed vat: ''DAÎŞî serra 2013î de û dima çend reyî xîret kerd ke hêriş bikero. La şerwanan nê hêrişî pûç kerdî. DAÎŞî dima le Reqa Minbic, Cerablus û Sirîn îşxal kerdî Kobanê bi temamî girewte binê ablûqa. 14ê êlule de DAÎŞî hêrişê Kobanê kerd. Dewleta tirke raşta raşte paştî daye dewleta tirke. Dewleta tirke cebilxane, çek û loîstîk dayêne DAÎŞî. Hetê bînî ra warê hewayî yê dewleta tirke ra bi hezaran cergî Ewropa ra derbaz bîyî. 

Şewa 14ê êlule dewa Telikî de hêriş dest pêkerd. Dima zî hetê başûr û rojhelatî de dest pêkerd. DAÎŞî birîndarê xo berdêne Tirkîya. 22 rojan ra dima cergê DAÎŞî resayî Kobanê. Hêrişanê vera Kobanê 15ê êlule de dest pêkerd. Labelê qederê şerê Kobanê bi xoverdayîê Serzûrî dîyar bi.

Pê xoverdayîşê 12 şerwananê YPG û YPJyî derba verêne dîyaye DAÎŞî ro. Şerwananê cepheyê Serzûrî vatêne 'Se beno wa bibo ganî Kobanê nêkewa destê DAÎŞî.' DAÎŞî bi xo îtîraf kerd ke ê Serzûrî de şikîyayî. 

DAÎŞî tankê tewr averî Kobanê de ca kerdbî. Destê înan de hawanê tewr averî estbîyî. Xoverdayîşê 22 rojan ra dima DAÎŞ 5ê teşrîna verêne de resa Miştenurî. Serzûrî ra dima DAÎŞ reya diyîne Girê Dolî de şikîya. Nê xoverdayîşî averşîyayîşê DAÎŞî yê ver bi Kobanê 10 kîlometreyan vindarna.

Verî ke DAÎŞ bireso Kobanê Rayber Apoyî veng da, îdareyo pêroyî zî seferberîye îlan kerd. Vengdayîşê Rayberîye ra dima çar hetanê Kurdîstanî û Ewropa ra ciwanî herikîyayî Kobanê. Şarê Vakurê Kurdîstanî pê destanê xo têlî berz kerdî û derbazê Kobanê bi. 

Wexto ke ciwanî sînorî ra derbaz bîyêne tay cergan peyî ra nê ciwanî şehîd kerdî. Şehîdgehê Dîcle yê Kobanê de bi seyan şehîdê bênameyî estê.  Tîya de şehîdê kurd, tirkmen, ereb, sûryanî û enternasyonalîstî estê.

Vengdayîşê Rayber Apoyî tesîrê pêro dinya kerd. Bi taybetî şerwanan tira hêz girewt, şer kerd û ser kewtî. Warêkê qijî de bi seyan, bi hezaran cergan vera şerwanan şer kerdêne. Rixmê ney zî şerwanî ser kewtî. Şarî zî bi nê hawayî xo ver da. Şerê Kobanê de 2 çîyan serkewtiş ard; îrade û embazîye. 

Ez zaf bişans a ke mi şahîdîya nê xoverdayîşî kerde.  A raşte Kobanê de binkewtişê DAÎŞî binkewtişê dewleta tirke bi. Ewro hema zî dewleta tirke hêrişê Kobanê kena û xîret kena ke DAÎŞî newe ra gandar bikera. Çunke hema zî aye binkewtişê xo yê Kobanê xo vîr a nêkerdo.''