Vervatoxê Meclîsê Leşkerî yê Minbicî Şervan Derwêşî bi wesîleya serrgêra xelisnayîşê Kobanê derheqê şehîd Faysal Ebû Leylayî de ANFyî rê qisey kerd.

Derwêşî da zanayene ke şorişî ra ver o û Ebû Leyla ê karê tamîrê wesayîtan de xebitîyayêne. Derwêşî vat: ''Wexto ke vera DAÎŞî hewceyê hêzanê pawitişî estbi Ebû Leyla vazda. O a kome ra yo ke reya verêne hêzê xopawitişî de ca girewt. Ma eşkenê vajê ke Minbic de têgêrayîşo destpêk ê pawitişî şexsê Ebû Leylayî de dest pêkerd. Ey her karî kerdêne, rêxistin kerdêne, aver berdêne. Ey bire dayêne û ardêne ca. Ey tim cepheyê tewr vernî de girewtêne. O merdimêkê wextanê zehmetan bi.

Eke şarê Minbicî nêame qetilkerdene no xêerê Ebû Leylayî ra yo. Xora DAÎŞî o çax Reqa, Tebqa, Til Eran û Girê Spî vistbi destî. Ebû Leyla serê sibayî saete 04.00 de bi rayîrê cîhazî vatêne 'Ez şina DAÎŞ de şer kena, kam wazeno wa bêro.' ebû Leylayî çeleyê 2014î de hêrişê DAÎŞî yê vera Minbicî şikna. 250 cergê DAÎŞî esîr kerdî.

Dima ke Minbic ame xelisnayene ey narey şerê Kobanê de cayê xo girewt. Hêz û îradeyê ey tesîrê her kesî kerdêne, ey her kes viist mîyanê têgêrayîşî. Cepheyê ci cîya bi, zaf bidîsîplîn bi. 29ê teşrîna peyene de Berê Murşîtpinarî birîndar bi. O rojêke nêweşxaneyî ra gêra mi û rewşa şerî persa. Birîndar bibi zî astengîye nêşinasnayêne. Xora o 14 reyî birîndar bi. Ey kuçeyanê Kobanê de vatêne 'Ma do nê kuçeyan de serkewtişî bîyarê.' Hêvîya xo qetî vînî nêkerdêne. Ey Hemleya Minbicî de safhaya amadekarîye de ca girewt. La wexto ke şerwanî gêrayîyayî binê ablûqa nêeşka vindero û şi mudaxele. Dima ke kome ablûqa ra xelisîyaye, agêrayîş de hêrişê hawanî de o şehîd bi. Roja 5. ya hemle bîye.

Şehadetê  ci zaf tesîrê şerwanan kerd. Armancê ci qedînayîşê DAÎŞî bi. Faysal ebû Leyla Şorişê Rojawanî û Rojawan de wayîrê rolêkê girîngî bi. Ewro zî sey şerwananê Şemsê Şemalî heta ke ma azadîye mende bikerê û nê erdî bi temamî bixelisnê do şer bikerê.''