Baroyan gerreyê Ozdagî kerd: Şêx Seîd rumetê ma yo

Umit Ozdagî hesabê xo yê medyaya sanale de Şêx Seîdî rê heqaret kerdbi û şuxulnayoxanê medyaya sanale bi takê #ŞêxSeîdRûmetameye nêrazîbîyayîş mojnabi. Komeleya Şêx Seîdî û baroyanê Amed û Riha gerreyê Ozdagî kerd.

Serekê Pêroyî yê Partîya Zaferî Umit Ozdagî çend rojî verî hesabê xo yê medyaya sanale de derheqê Şêx Seîdî twîtêk pare kerdbi û ey rê bi hewayêkê giranî heqaret kerdbi. Şuxulnayoxanê medyaya sanale zî fotografê Şêx Sêîdî girewtî profîlanê xo bi takê Şêx Seîd rumetê ma yo nêrazîbîyayîş mojnabi.

Serekê Komeleya Şêx Seîd û Embazanê ci Kasim Firatî hesabê xo yê medyaya sanale de nêrazîbîyayîş mojna û vat: ''Êyê ke Şêx Seîd Efendîyî rê ziwanê xo derg kenê wa bizanê ke ma çirey verê zaliman de çok nêda. Şêx Seîd Efendî rumetê şarê kurdî û bawerkerdoxan o. Ez pê bawer a ke cewabê nê faşîstan do bêro dayene.''

Vizêr Komeleya Şêx Seîd û Embazanê ci  û baroyanê Amed û Riha gerreyê Ozdagî kerd. Waştişnameyo gerreyî de ame vatene ke vîrameyîşê Şêx Seîdî rê heqareto giran ameyo kerdene û şar dişmenîye rê ameyo tehrîqkerdene û waştene ke wa Ozdag bêro cezakerdene.