Şingal de 3ê tebaxa 2014î de DAÎŞî hêrişê êzidîyan kerdbi û xeylêk merdimî qetil kerdbî. Serrgêra qirkerdişî de rayberîya Komîteya Şehîdan de qurbanî pê merasîmêkî ameyî yadkerdene. 

Îdarekar û endamê TAJÊ, PADê, REJAK, wekîlê HDPyî Semra Guzel û Feleknase Uca, heyetê Başûrê Kurdîstanî û bi hezaran êzidîyî tewrê merasîmî bîyî.

Endama REJAKî Destîna Germîyanî merasîm de qisey kerd û ard ziwan ke kesê bîyê sebebê fermanî Başûrê Kurdîstanî de îqtîdar ê û ganî nê kesî bêrê muhakemekerdene.

Çarçewa bernameyê yadkerdişî de gorê komkî yê Gir Zerek, Til Ezer, Sîba Şêx Xidirî ameyî zîyaretkerdene. Qurbanê qirkerdişî 8 goranê komkîyan de ameybî definkerdene û heta nika 12 gorê komkîy ameyî akerdene.

Serrgêra 7. ya Fermanê 73. de êzidîyan Şingal de rayraşîyayîşêko pîl kerd. Verî serê sibayî 5 deqayan cuye vinderte.  Rayraşîyayîş bajarekê Sinûnî de dest pêkerd û heta warê şehîd Zerdeştî dewam kerd. Wekîlê HDPyî Feleknase Uca, Semra Guzel, Têgêrayîşê Ciwanan ê Êzidîyan, TAJÊ, PADÊ, Meclîsê Şarî, Alîmê Dînî yê Êzidîyî zî tede xeylêk kesî tewrê rayraşîyayîşî bîyî. Rayraşîyayîş de pankarta bi nuşteyê 'Qesasê 74 fermanan xopawitiş o' ameye akerdene û sloganê sey 'Biciwîyo xoverdayîşê Şingalî' ameyî vatene.

Deqayêkê rêzgirewtişî ra dima Fermandarê YBŞyî Pîro Şengalîyî qisey kerd û da zanayene ke ê do tim Şingalî bipawê. Alîmê dînî Man Bedelî zî qiseykerdişê xo de ard ziwan ke xoverdayîşê vera qirkerdişan sond û ayetan de zî esto.

Rayraşîyayîş pê sloganan qedîya.