Hetkarê Hemserekanê Îdareyê Xoserî Hesen Koçerîbi wesîleya Şorişê Rojawanî yê 19ê Temmuze ANFyî rê qisey kerd.

''Destpêkî ra nata dewleta tirke û hîzbê sey Cephet el Nûsra hêrişê Rojawanî kenê. Serra 2012î de înan hêrişê Serêkanîyê kerd, waşt ke bi nê hawayî têkilîya Kobanê zî bi şaristananê bînan bibirnê. La Serêkanîyê de xoverdayîşêko pîl ame kerdene. Cephet El Nûsta û komê bînî Serêkanîyê ra vejîyayî. Hêzanê ma îsbat kerd ke ê eşkenê şarî bipawê. Dewleta tirke naye ser o DAÎŞ û PDKyî reyde îtîfaq kerd.Hedefê DAÎŞî pêro Sûrîye bi la dewleta tirke rîyê DAÎŞî ver bi kurdan zivirna. DAÎŞî qaşo Kobanê girewtêne la nêeşka. Semedo ke DAÎŞ tasfîye bi nika dewleta tirke armancanê xo bi xo ana ca. Vera DAÎŞî xoverdayîşo destanwarî ame kerdene. PDK Şingalî rema, pêro dinya ney zanena. Koalîsyono mîyanneteweyî neçare mend ke YPG-YPJyî reyde îtîfaq bikero. Hêzanê YPG-YPJyî Kobanê, Minbic, Reqa û Dêra Zor kerdî azad. Bi nê hawayî Şorişê 19ê Temmuze kewt prosesêkê bînî.

No proses çî yo? 2014 de Îdareyo Xoser ronîya, dima Hêzê Sûrîyeya Demokratîke (QSD) ronîyayî. Bi nê hawayî şaranê Sûrîye pê yewîya xo vera DAÎŞî şer kerd û şoriş kerd pîlêr. Şorişî zî hêrişanê DAÎŞî zî Kobanê de dest pêkerd. DAÎŞî waştêne noqtaya destpêkerdişî de şoriş çin bikero la ê çin bîyî. Dewletê mîyanneteweyî bi taybetî dewleta tirke pê pîlbîyayîşê şorişî qayîl nîyê. Çunke dewleta tirke estbîyayîşê xo çinbîyayîşê kurdan ser o rona. Dewleta tirke cergê DAÎŞî ardî Efrîn de ca kerdî û dima pê bahaneya 'asayîşî' hêrişê Rojawanî kerd. Şorişê Rojawanî bi hêvî, Tirkîya wazena na hêvî werte ra wedarna.

Şorişê ma hema temam nêbîyo. Ganî ma kêmasîyanê xo safî bikerê û şarê xo rê îdareyêkê başî pêşkêş bikerê. Ma hêzê xo şarê xo rê gênê, ma pabesteyê hêzanê teberî nîyê. Eke şarê Rojawanî bibê yew eşkenê destkewteyanê xo û estbîyayîşê xo bipawê. Dewletê sey Amerîka û Rûsya hê peyê menfaatanê xo de yê. Modelê îdareyê xoserî ma rê zî newe yo, zaf tecrubeyê ma çin ê û xora kêmasîyê ma estê. La ma eşkenê heqê nînan ra bêrê.

Ma pê mîrasê 19ê Temmuze sîstemê perwerdeyî, hêzê leşkerî, sîstemê şaredarîye, dezgehê cinîyan ûsn. awan kerdî. Xora Şorişê Rojawanî şorişê cinîyan o. Sîstemê Îdareyê Xoserî de zî cinîyî ca gênê. Ewro çimê pêro dinya rojawanî ser o yê. Wezîfeyê ma yo ke ma nê şorişî pîlêr bikerê û pêro dinya rê bidê şinasnayene. Wa şarê ma bizano ke Şorişê 19ê Temmuze şorişê înan o û Îdareyo Xoser zî îdareyê înan o. Ma pereyanê xo şarê xo rê xerc kenê, sey tayênan bankayan de nênimnenê. Seba şarê ma çi bikewo ma milî ma do bikerê. Ma do Şorişê 19ê Temmuze zî destkewteyanê şarê xo zî bipawê.''