Komeleya Al Beytî ya ke 3yê hezîrane de ronîyaya, bi komîteyanê xo do şaristananê Rojawanî de vera fikranê Îslamî yo ke dewleta tirke û DAÎŞî herimnayê, bingeyê misilmanîye bipawa û haştîye-yewîye awan bikera.
Rojawanê Kurdîstanî de Komeleya Al Sada Al Aşarif Al Beyt (Zerrîwazanê Hz. Mihemedî) 3yê hezîrane de Tebqa de bi konferansêkî ronîyayîşê xo îlan kerd. Komele Peymana Medîne esas gêna, binê sîwana Kongreya Îslamî ya Demokratîke de xo rêxistin kena. Komele şaristananê Rojawanî de komîteyan do awan bikera û seba her komîte 15 endaman zî erkdar bikera.
Serekê Komeleya Al Beytî Şêx Sînan Seydoşî pare kerd ke ê armanc kenê ke fikran û exlaqê Hz. Mihemedî mîyanê komelî de vila bikerê û vat: ''Cergê ke binê nameyê Îslamîyetî de têgêrenê, dînê Îslamî herimnenê. Ma do her herêma Rojawanî de komîteyanê xo ronê û meseleyanê komelî de eleqedar bibê. Ma do bikerê ke kokê Îslamî vejê werte û mabênê misilmanan û xirîstîyanan de yewîye awan bikerê. Ma do komelî derheqê hêrişanê dewleta tirke û provakasyonanê ci de hayîdar û hişyar bikerê.''
Endama Komeleya Al Beytî Dîya Al Makdad vat: ''Binê nameyê dînî de destkewte û heqê cinîyan yenê xespkerdene. Ma do bi rayîrê komeleya xo bibê vengê cinîyan û bikerê ke cinîyî her warê komelî de cabigêrê. Ma nika ra bi taybetî komîteyê cinîyan awan kerdî. Nê komîteyî do tim cinîyan de têkilîye virazê. Ma do pêro cinîyan daxîlê xebatanê xo bikerê û bibê teqîbkerdoxê Fatma Zehra. Ma do seba cinîyan ofîsanê taybetan zî abikerê.''
Dîrektorê Ofîsî yê Komele Cuneyd Al Sayadîyî vat: ''Ma do bikerê ke xebatanê Tirkîya yê serê misilmananê Rojawanî û Sûrîye vindarnê. Ma zanenê ke AKPyî senî sûrîyeyîjî weçînayîşan de şuxilnayê. Ez venga pêro şarê ma û serekanê eşîran dana ke wa nêkewê dafika dewleta tirke û abigêrê kokê xo ser.''
Hemsereka Kongreya Îslamî ya Demokratîke Delale Xelîl vat: ''Dewleta tirke Rojawan de binê nameyê Îslamîyetî de polîtîkayanê gemarinan ana ca. Sey Kongreya Îslamî û yewîya bawerîyan a Rojawanî erkê ma yo ke ma nê polîtîkayan pûç bikerê. Ma do bi xebatanê xo yê komele cinîyan zî komelî mîyan de bikerê wayîrê vîzyon û mîsyonî. Hema zî komelî ser de tesîrê fikranê DAÎŞî est ê. DAÎŞ zî Îslamîyetî goreyê menfaetanê xo şirove keno. Ma do bi rayîrê Komeleya Al Beytî nê tesîranê fikrîyan wedarnê. Ma do xêrê Peymana Medîne, hîkayeyanê Hz. Mihemedî û ayetanê Quranî dînê Îslamî aver berê.''
