Endamê Konseya Hemserekîye ya PYDyî Aldar Xelîlî destbendkerdişê temsîlkaranê Îdareyê Xoserî-PYDyî, hetê MÎTî ra cipersayîşê înan, sînorê Sêmalka de astengîya PDKyî û armancê hêrişanê dewleta tirke ANFyî rê ercnayî.

Aldarî ard ziwan ke Erdogan û Tirkîya wazenê Başûr û Rojawanî îşxal bikerê û vat: ''Xoverdayîşê Rojawan û gerîlayan ra nêbîyêne Erdoganî rew ra xo resnabi Mûsil û Kerkûkî. Ganî şarê Başûrî û hêzê sîyasî yê Başûrî vera nê hêrişan vejîyê. PDK paştî dano hêrişanê Tirkîya. Key Tirkîya hêriş kena Neteweyê Yewbîyayeyî, Bexdad, welatê erebî û PDK kenê ke hêrişan meşrû bikerê. No tewirêko Kurdîstanî nîyo. Mabênê kurdan de çend nakokîyî estbê zî ganî kurdî vera îşxalkeran bibê yew. Wexto ke vera gerîlayan hêriş yeno kerdene tay kesî vanê 'wa gerîlayî tîya ra vejîyê.' Yewîye têna pê sloganan nêbeno, pê tewirê vera dişmenî beno.''

Aldar Xelîlî bale ante sewqîyatê leşkerî yê PDKyî ser û vat: ''Çira 20-30 serran o nêşîyê la ewro şinê ê waran? Gerîlayî nêşîyê Dihok, Hewlêr, Silêmanî nêdayo pêşmergeyan ro. Eqsê ci gerîlayî her roje raştê hêrişan yenê. Eke ti tewrê şerî nêbeno mebe la mevajê 'Çira gerîlayî ameyê tîya.' Eke Erdogan Ewropa, Afrîka, Amerîka û Kurdîstan de ser bikewo no ma rê xirab o. Erdoganî Efrîn, Serêkanîyê, Girê Sipî, Cerablus, Bab, Ezaz îşxal kerdî, heqê şarê ma erdî. 

Tirkîya şîya hêrişê Başûr û gerîlayan kena, dewanê Başûrî veng kena, dana şarê sivîlî ro, baregehanê leşkerîyan awan kena. 30 baregehê înan Başûr de estê, no îşxal o. Eke Başûr çin bibo Rojawan zî çin beno. Ma nêwazenê Başûr destî ra şoro. Îşxalê Başûrî do Rojawanî bifatisno. Coka ganî her kes vera hêrişanê Tirkîya tewirê xo bimojno û paştî bido gerîlayan. Eke xoverdayîşê Zap, Metîna û Avaşînî ser bikewo statuyê Rojawanî do berzêr û mende bibo.''

Aldar Xelîlî vist vîrî ke temsîlkarê Îdareyê Xoserî û PYDyî Hewlêr de ameyê destbendkerdene û vat: ''Înan uja de şarê xo temsîl kerdêne, dizdîye, xirabîye, sûcêk nêkerdê la ameyî destbendkerdene. Welatperwerîye, neteweyîye, yewîye Kurdîstanîye no yo? Ma prosesê merg û cuye de yê. Eke Erdogan ser bikewo bi nameyê Başûrî çîyêk nêmaneno, Rojawan nêmaneno. Çarenusê ma yew o. Ma aqîbetê temsîlkaranê xo nêzanenê. Goreyê agahîyanê ke resayê ma MÎT embazanê ma ra îfade gêno. Rewşêka tewş a.''

Aldar Xelîlî derheqê astengkerdişê berê sînorî yê Sêmalka de vat: ''Kam berî ra şoro bêro persê îstîxbaratî tira yenê perskerdene, persê ke rûmetê merdiman şiknenê. Şar ney ra ecîz o. Îdareyê Rojawanî zî na babete de nîqaş keno ke se bikero. Key Îdareyê Rojawanî ney qebul nêkero vanê 'Rojawan wazeno berî bigêro.' Îdareyê Rojawanî wazeno şar bi hawayêkê rûmetênî şoro û bêro.''