Artêşa tirke ya îşxalkere vizêr şewe dewa Aqîbê ya qezaya Şêrawa ya Efrînî ser o bombayî varnayî. Bombarduman de Hesen Izet Mihemed (55), Fatime Elî (46) û domana ci Sîrocede Hesen Mihemed (12) şehîd bîyî û Mufîda Remzî Hesen (48), Îsmet Hemo (40), domanê bi nameyê Cemîl Hemû (8) ke keyeyêkî ra yê û dewa Korzelê ya qezaya Şêrawa ra yê, birîndar bîyî. Birîndarî ameyî berdene bi Nêweşxaneyê Avrînî yê qezaya Fafînî yê kantonê Şehba.

Derheqê serebûtî de hemşîreya Nêweşxaneyê Avrînî Mizgîne Îbo qisey kerd û vat: ''Bînşewe artêşa tirke û cerganê ci dewa Aqîbê ya Şêrawa ser o bombayî varnayî, 3 kesî birîndar bîyî. Cinîya birîndare lingê xi şikite yo, mêrikî zî sereyê xo ra derbe girewte û birînê domanî zî şenik o, nika rewşa înan baş a.''

Vizêr şewe her di keyeyî zî bînayêke de kom bibi û wextê bombardumanî de keye rijîya serê hemwelatîyan. Bombardumanî ra şehîdî heta serê sibayî binê xerbeyan de mendî. Şehîdî bombardûmanî ra dima ameyî vetene.

2ê kanûna 2019î de zî artêşa tirke ya îşxalkere Til Rifat de qirkerdişêk kerd û netîce de 8ê înan domanî 10 sivîlî birîndar bibî.