Paytextê Îngilîstanî London de vizêr polîsan eştbi Merkezê Komelê Kurdan ser û Hemsereka Meclîsê Şarê Kurdî Turkane Budak, xebatkarê MErkezî Ercan Akbal, sîyasetmedar Alî Poyraz, û xeylê kesê bînî destbend kerdbî. Merkez hema zî binê ablûqa de yo.

Ame parekerdene ke polîsan kurdanê destbendkerdeyan rê derheqê PKKyî de persî persayî.

Avûkatanê kurdan ra Alî Hasî derheqê babete de ajansê ma rê qisey kerd.

Hasî pare kerd ke no operasyon seba krîmînalîzekerdişê kurdan o û vat: ''Muwekîlanê ma rê polîsan persa ke ê endam yan zî sempatîzanê PKKyî yê yan ney. Heta nika seba sebebê destbendkerdişî delîlêko zelal nêameyo mojnayene. Nameyê kesanê destbendkerdeyan verî ra ameyê dîyarkerdene. Xora polîsan bi hawayêkê hemwextî saete hîrêyê şewe de eşto bînaya merkezî û keyeyan ser. A saete de sereştiş îşkence yo. 

Polîsan vato ke merkez de fotografê Ocalanî û şehîdan est bîyê. LA no sûc nîyo. Hetê bînî polîsan Dogan K. û Mazlûm S. rê derheqê dosyaya înan a Tirkîya de persî persayê. polîsî bi persanê dewayanê polîtîkan ê Tirkîya rolê dozgeranê tirkan girewto xo ser.

Polîsî îdîa kenê ke Merkezê Komelê Kurdan merkezê PKKyî yo û bi madeya 41ine merkez qefilnayo. Brîtanya 2023 de Qanûnê Asayîşê Neteweyîyî vetbi. Bi nê qanûnî înîsîyatîf dîya ke polîsî bi rehetî bê delîlan têbigêrê. Muwekîlê ma zî çarçewa nê qanûnî de ameyê destbendkerdene. Bi nê operasyonî esil ame waştene ke çimê kurdan bêrê tersnayene.''