Avûkat Ezio Menzioneyî ard ziwan ke ganî dewleta tirke game bierza û vat: ‘’Ganî dewleta tirke Ocalano ke garantîyê prosesî yo, tepişteyanê sîyasîyan vera bida. Na game do biba nîşaneya samîmîyetê ci.’’
Avûkatê îtalyanî Ezio Menzioneyî derheqê Vengdayîşê Rayber Apoyî, Kongreya PKKyî û prosesê peyê nînan de ajansê ma rê qisey kerd.
Menzioneyî ard ziwan ke birê Kongreya PKKyî seba çareserîya demokratîke ya meseleya kurdan zaf pozîtîf a û ganî Erdogan verê ney de gamanê pozîtîfan bierzo. Menzioneyî vat: ‘’Birê kongre manadar ê. Haştîye bi beşdarîya wird hetan bena. Hinî ganî dewlete game bierza. Erdoganî bi xo hema zî eşkerayîyêke nêdaye. Rixmê biranê kongre zî Ocalan hema zî tepişte yo. Birêz Ocalan garantîyê prosesî yo û ganî cade vera bidîyo. Ocalan do bieşko biranê kongre bivisno dewre.
Dewlete pabeyê çita ya? Wa Ocalan vera bidîyo. Seke Bahçelîyî zî waşt ganî Ocalan şoro Meclîs de qisey bikero. Ganî tepişteyê sîyasîyî yê bînî zî vera bidîyê. Eke Tirkîya raşta zî wazena kurdan de pêbikera ganî nînan bikera. Çira hemşaredar û sîyasetmedarê kurdî hema zî tepişte yê? Eke PKK çin bo gefêk zî do çin bo. Yanî ganî dewleta tirke gamanê zelalan bierza.’’
Menioneyî îfade kerd ke ganî Ewropa û Amerîka tewirê xo yê vera PKKyî bivurnê û vat: ‘’Na rêxistine ha xo qedînena. Ganî tewirê vera ci biqedo.’’
